Minister a reuni cu Camara di Comercio pa brinda informacion riba BBO na frontera

ORANJESTAD – Un dia cu e gremio comercial Aruba Trade & Industry Association (ATIA) a mustra cu nan ta ainda ‘den scuridad’ pa loke ta e introduccion di e ley pa cobra BBO na frontera, minister di finanza Xiomara Maduro a publica diaranson cu e siman tras di lomba e la reuni cu Camara di Comercio hunto cu Departamento di Impuesto pa asina por a brinda informacion y atende cu algun inkietud pa locual ta trata e introduccion di BBO na frontera. Segun e minister, e tabata un bon reunion den cual e minister a cera conoci cu sr. Gavril Mansur como Presidente y e board nobo di Camara di Comercio. Durante e reunion sr. Mansur y e miembronan di board a ricibi un bista di e resultado di entrada di Pais Aruba pa e promer kwartaal y tambe a haya un presentacion di DIMP riba e introduccion di BBO na frontera. Cu e informacion brinda, hopi pregunta a keda contesta y inkietudnan por a wordo atendi. Minister Maduro a splica cu Camara di Comercio como un instancia di interes (stakeholder) tambe ta invita pa participa na e sesionnan di informacion organisa pa DIMP y Aduana den cual nan ta brinda informacion mas detaya riba e cambio fiscal di BBO na frontera. Na final Minister Maduro a informa cu asina Gobierno ricibi e conseho di Raad van Advies lo atende cu esaki pa asina por manda e concepto di ley pa su tratamento na Parlamento.