Corte federal Mericano a apunta abogado publico pa Joran vd Sloot caba pa e caso di extorcion

BIRMINGHAM – Corte Federal na e estado di Alabama a apunta abogado publico Kevin Butler pa representa e sospechoso Joran vd Sloot ora cu e ta na Merca pa e caso di extorsion y estafa. Asina prensa Mericano ta raportando diaranson, citando documentonan di Corte. Ta Butler mes a haci e peticion pa e representacion di vd Sloot, y e huez federal Gray Borden a aproba e nombracion. Esaki ta pone nan un paso mas cerca pa e caso contra vd Sloot, pa cual e mester wordo treci temporalmente for di Peru pa e caso aki.  Di otro banda, tin posibilidad cu por dura mas largo prome cu logra extradita vd Sloot debi cu su abogado por reta e sistema y envoca e asina yama 'habeas corpus' cu ta basicamente cuestiona e proceso di detencion of carcelacion y e proceso di extradicion. Si esey logra, por tarda e proceso te cu por lo menos augustus di e aña aki. Vd Sloot ta e sospechoso principal den e caso di desaparicion di e turista Mericano Natalee Holloway na 2005 na Aruba. 

PERMANECE NA MERCA

Manera cu Noticiacla a raporta un dia anterior, e intencion ta pa tene vd Sloot pa un periodo maximo di 2 aña na Merca, pa asina e por pasa den e proceso di e caso, incluyendo un eventual apelacion si partidonan no ta di acuerdo cu e resultado inicial di e caso. Despues cu tur esaki ta cla, e ora vd Sloot por bolbe Peru pa caba sinta su castigo di 28 aña di prizon na Peru pa morto di e Peruana Flores. E castigo pa e dos delitonan cu ta sospecha vd Sloot di dje na Merca ta conta cu 25 aña di prizon pa cada uno. Esey ta nifica cu vd Sloot lo ta un homber di edad hopi avansa ora cu e recobra su libertad, of porta nunca mas e lo por experencia libertad atrobe. Pesey cierto abogadonan ta considera cu si e haya e castigo maximo, por bien compare cu un castigo di bida largo den prizon, pasobra technicamente e lo no sali mas.