Mike Eman: Salida di Gerlien Croes di AVP ta algo hopi doloroso

ORANJESTAD – ‘Hopi doloroso’ tabata e prome reaccion di lider di partido AVP, Mike Eman riba e retiro di Gerlien Croes for di e partido. “Bo no kier perde un miembro di partido y sigur no bo no kier perde un bon miembro di partido” Eman a sigui bisa. E la confirma cu e tabata un momento no oportuno cu e partido kier a evita, mirando cu awor e partido mester ta esun cu tin cu convence tur hende pa saca Aruba for di e problemanan cu tin. Y cu un situacion asina, unda cu varios persona ta bandona e partido, e no ta e miho situacion. Eman a usa e dicho na ingles, ‘when it rains, it pours’, cu ta nifica cu ora cu un cos ta cuminsa varios ta sigui su tras. Asina mes, Eman kier a sigura cu e partido lo Sali for di esaki tambe y bira aun mas grandi, manera segun Eman, historia a demonstra. 

GERLIEN COMO LIDER

Interesante tabata pa scucha confirmacion di Eman, cu e tabata mira Gerlien Croes como futuro lider di e partido, unda cu e la mira den dje, un persona cu por a lidera e partido y como tal, a sigura cu a dune tur espacio pa traha riba esaki y representa e partido na tur occasion den e capacidad aki. Y no obstante combersacionan largo cu a sostene cu Croes, no a logra convence pa e keda. 

FORTIFICA E PARTIDO

E hecho cu e partido a keda reduci na uno cu tin apenas 5 asiento den Parlamento, compara cu 7 anteriormente, ta pone cu segun Eman, e 5 nan tin cu bay traha aun mas duro pa logra e trabou di representacion pa asina logra e conviccion pa convence e pueblo cu esaki realmente ta e partido cu tin cu ‘rescata e pueblo’.  Tabata notable, cu for di cada pregunta riba e tema, Eman usando su experiencia politico, tabata bira esaki den un contesta positivo den su direccion, unda cu ta mustra cu aunke cu tin kiebro den partido, ta sigi kere cu e partido aki ta esun cu lo lidera e partido.