Reunion publico riba costo di bida, lo ta un ‘showdown’ politico!

ORANJESTAD – Awe mainta Parlamento ta cuminsa trata un reunion publico cu e tema ‘ Forza di Compra’. E reunion aki o ta interesante pa varios motibo. Esaki ta entre otro pasobra aki e dos partidonan grandi AVP y MEP lo debati otro, manera cu e partido MEP mes a anuncia siman pasa. Ademas ta prome biaha cu e parlamentario Ryçon Santos Do Nascimento lo presenta den Parlamento como independiente, mientras cu parlamentario Gerlien Croes (tambe di AVP), lo tin cu navega entre su coleganan despues cu e mes a cataloga su ultimo experiencia cu nan como ‘humiliante’. Tambe ta prome biaha cu parlamentario Benny Sevinger ta den Parlamento despues cu e la keda sentencia na castigo di prizon dos siman pasa. 

DEBATE

Interesante ta cu e partido na mando MEP mes a yama atencion na e reunion aki, completo cu pamfleta, pa anuncia cu esaki lo bira un debate entre e dos lidernan di partido grandi, Mike Eman y Evelyn Wever Croes. Mientras cu e intencion ta pa debati otro den un forma respeta, esaki lo sigur bira un tiramento di palabra pa otro, cu por culmina den un nivel cu ningun hende lo kier experencia. 

RYÇON Y GERLIEN

Tanto Ryçon Santos Do Nascimento como Gerlien Croes lo tin wowo riba nan, debi cu cada uno lo ta den un situacion ‘nobo’. Santos Do Nascimento, como prome biaha independente, unda cu lo mira ki direccion e lo bay y mas importante, con e partido AVP lo comporta su mes cu su ex miembro. Gerlien Croes siman pasa ainda a admiti cu a humilia su persona un siman pasa ainda, pero cu e la opta pa evalua su opcionan prome cu e dicidi su rumbo. Un decision cu por tin consecuencia p’e, depende con e maneha su mes y con e partido respald’e. Esaki lo crea critica sigur di oponentenan di Croes. 

SEVINGER

Y finalmente, Benny Sevinger ta presenta prome biaha den Parlamento despues di a keda sentencia cu castigo di prizon, pa e caso penal Avestruz. Pa ley, Sevinger por keda parlamentario, pues su presencia lo tey sigur y esaki lo crea e atakenan necesario di parti di su oponentenan, cu ta haya cu un persona asina no mester ta den Parlamento, ya cu e ta un persona condena aworaki. 

MIKE Y EVELYN

Y ta keda e debate entre Mike Eman y Evelyn Wever, unda cu cada uno lo no ria pa otro. Hopi ta cuestiona Eman su liderazgo, pa e disputa recien entre ex miembro Do Nascimento y de Meza, cu nunca no a keda ‘resolvi’, y e hecho cu e partido a opta pa ‘celebra’ e sentencia di nan miembro Sevinger ora cu esaki a tuma lugar recientement. Oponentenan ta mira esaki como un falta di liderazgo, y un mal zet politicamente. Pa loke ta Wever Croes, nan lo sigur haci Eman e blanco di atake pa su pasado maneho, cu segun MEP, ta e causa cu Aruba ta den un situacion manera cu e ta aworaki. Por spera comentarionan defensivo di ambos banda pa e fenomeno, friends and family, abuso, corupcion y e palabra ‘integridad’. E reunion ta poni pa cuminsa pa 10’or y no tin ora di caba.