Tata di sospechosonan Williams, politico Micheal Williams a keda expulsa di sala di Corte

ORANJESTAD –  E  tata di sospechosonan N. y C. Williams, politico Micheal Williams a keda expulsa di sala di Corte dialuna atardi. Manera cu noticiacla a raporta caba den un articulo adhunto, awe mainta a cuminsa e caso di aggression entre yiunan di dos politico, di cual uno ta prome minister Wever Croes y e otro ta politico Micheal Williams. E cuater sospechosonan ta wordo acusa cu riba 14 November 2021 a causa violencia publico den Asia Restaurant caminda a destrui un cantidad di glas y tambe a herida un chef cook severamente na su man drechi.

A SACA E TATA DI CORTE

Tabata den oranan di merdia, despues cu Fiscal a exigi castigo pa e cuater sospechosonan, cu tabata turno di e abogadonan pa hiba defensa di nan respectivo clientenan. Loke a crea rabia den e sala pa parti di e famia Williams ta ora cu abogado Anthony Ruiz, pa defensa di K. Wever, a yama e dos rumanan Williams como ‘zware jongens’ y cu e loke cu su cliente a haci, tabata defensa propio. E acusacion aki no a cay den bon tera cerca e campo di Williams, incluyendo e defensa. Dado momento, e rymanan Williams a expresa ‘bo ta bay haya den hende’, cu por a wordo interpreta como un menasa contra e abogado. Despues abogado di un di e rumanan, esta abogado Rozenstand, a protesta con e abogado Ruiz tabata acusa su clientenan. E rumanan Williams no a ria y tabata papia cu voz halto den corte, purbando di interumpi Ruiz. Dado momento e buchi di e huez a yena y e la bisa e rumanan Williams pa keda keto. Aki a surgi un zonido duro den sala, cu a resulta di ta e tata di e rumanan, cu a dal su man riba e mesa di e abogado y exigiendo cu mester a para e abogado Ruiz. 

EXPULSA WILLIAMS

Esaki a conduci cu e miembronan di CEA y polis a gara Williams (E tata) y sak’e for di e sala di corte. Saliendo for di corte, Williams a expresa na Ruiz, pa e ‘wak bo caya’. Ruiz e momento ey a pidi huez pa haci anotacion di e menasanan den e relato di corte. Huez a cera e caso y ta dicta sentencia dia 21 di April proximo. NOTA: E potret adhunto ta di e tata, saliendo for di corte dos siman pasa ora cu huez a cuminsa trata e caso pero mester a pospone esaki debi cu no tur sospechoso tabata presente.