- Departamento di Progreso Laboral (DPL) cu campaña pa entrega Formulario AMR 2023 den luna di Juni 2023
- Directie Financiën ta informa di e condicionan ora di trata cu cobransa pa instancianan di Gobierno
- Foyeto Abo ta bay studia dentro di poco na Hulanda – con pa registra den BRP
- DUCAPRO a presenta un plan pa promove e industria creativo y proteha e artistanan
- E prome barco di fruta y berdura di Venezuela ta yega Aruba dialuna awor
MoU firma cu University of Central Florida ta beneficia studiantenan di Aruba
MIAMI - Minister di Enseñansa di Aruba Endy Croes y Minister Plenipotenciario Joselin Croes a firma un MoU cu University f Central Florida, osea UCF. E tabata un negociacion cu a tuma basta luna pa por a logra esaki.
RECONOCIMENTO PA ARUBA
Aruba a wordo reconoci riba lista di Latin American and Caribbean Scholarship (LAC), cual a haci esaki posibel y ta cay bou “Florida State regulation” 7.007. Antes Aruba no tabata riba e lista di e paisnan cu por ricibi e beca (scholarship) aki. Despues di hopi trabou, a logra cu Aruba tambe a wordo agrega riba e lista aki y ta forma awo un total di 50 pais cu ta reconoci, unda nan studiantenan por yega na e fondonan aki. Scholarship LAC cu e universidad ta duna, mester ta conforme e acto di Estado General cu ta wordo duna na e universidadnan bou di seccion di inversion 1011.43, statutonan di Florida of di fondonan pa beca, autorisa pa Gobierno Federal. E universidadnan por haci uzo di e fondonan di sector priva, fundacionnan priva y/of agencianan publico tanten cu ta “match” e fondonan aki. Den e deal aki y di acuerdo cu e ley cu ta rigi pa estado di Florida, e studiante lo ricibi e suma minimo cu ta exigi pa ley di e estado, esta 500 dollar pa simester (1000 dollar pa aña) for di University of Central Florida. Ricibiendo e suma aki cash for di e universidad ta hacie posibel pa e studiante por aplica pa e LAC Scholarship. Esaki consecuentemente ta significa cu e studiante lo paga e “in state tuition” en bes di e “international tuition”. Kico esaki ta significa? Cu en bes e studiante paga un averahe di 28.658 dollar pa aña pa e “international tuition fee”, e studiante mester paga awo 6.380 dollar pa aña como “local tuition fee” of tambe yama “in state tuition” y ta haya 1000 dollar cash pa aña escolar di e universidad.
DEAL CU UCF:
E acuerdo ta nifica cu (5) studiante lo wordo selecta pa UCF. E logro aki ta valido desde aña 2023 y ta firma pa (3) aña consecutivo. Pues, 15 studiante den e proximo (3) añanan lo ricibi e privilegio aki pa full nan (4) aña di estudio. Posibilidad ta existi pa revisa e MuO na caminda, unda kisas por amplia esaki. Studiantenan cu wordo selecta mester mantene un GPA (Grade Point Average) di minimo 3.0, alabes mester tin nan estado di imigracion actualisa na tur momento y cumpli cu artikel 7.007 di e LAC Scholarship. Esaki ta un beca di tempo completo (fulltime scholarship).
UCF TA UN UNIVERSIDAD GRANDI CU HOPI POSIBILIDAD:
University of Central Florida tin alrededor di 70 mil studiante na diferente campus y ta ofrece un diversividad masha extenso di 240 estudio (opleiding). Finalisando, ta gradici tur esnan cu a traha duro pa hunto nos logra un tremendo deal cu University of Central Florida (UCF). Mesun momento kier encurasha e studiantenan interesa pa cuminsa aplica na UCF y asina keda registra, nan por aplica mesora pa e LAC Scholarship riba e portal web di UCF. Esaki ta oportunidadnan briyante pa futuro di nos studiantenan y cu ta hopi mas cerca di cas. Pabien Aruba!
Ex gobernador di New Jersey ta haci intento nobo pa bira president di Merca
MANCHESTER – Ex gobernadro di estado Mericano di New Jersey Chris Christie lo anuncia su candidatura pa presidencia di Merca pa 2024 otro siman diamars. Ta su di dos intento, despues cu e no a logra na 2016. E biaha ey e la termina na di 6 lugar. Despues e la endorsa Donald Trump cu a bira presidente.
Joran vd Sloot a keda mal bati den prizon na Peru prome cu extradicion
LIMA – E sospechoso principal di desaparicion di e mericano Natalee Holloway, Joran van der Sloot, a wordo bati severamente den prizon na Peru unda cu e ta sinta castigo pa asesinato di Stephany Flores. Asina su abogado a bisa e cadena di television Mericano ABC NEWS. E abogado no ta kere cu e ta relaciona cu e extradicion di vd Sloot pa Merca e siman aki. E sospechoso ta wardando extradicion pa Merca riba cargo di extorcion y fraude di intento di beneficia financieramente di e desaparicion di Holloway na 2005. Awe por cierto ta cumpli 18 aña cu e Mericano a disparce na Aruba. Vd Sloot actualmente ta den e seccion medico di e prizon y a pidi su traslado pa otro prizon mas liher cu ta posibel.
Conocida cantante local Carolyn Kelly a fayece repentinamente na Spaña
ORANJESTAD – Conocida cantante di Aruba Carolyn Kelly (49) a fayece repentinamente na Spaña e siman aki. E famia diabierna a confirma e noticia lamentable aki. Kelly tabata na Spaña di vacacion cerca su yiu grandi, y aki tres dia lo mester a celebra su di 50 cumpleaños. Carolyn a traha su nomber cantando e.o. cu gaitas y tabatin varios cancion otro tambe riba su nomber. Ademas ta bon pa menciona cu e ta yiu muher di e conocido cantante Vicente Kelly (Dfm). Informacionan ricibi, ta bisa cu e tabatin problema cu su pancreas pa un tempo, pero no a haya solucion pa esaki. E portal 24ora ta raporta cu diripiente den un supermercado na Spaña, Kelly a dal abou y perde conocemento, pero ya no por a haci nada mas p’e. Noticiacla ta manda palabra di profundo pesame na famianan di Carolyn. Cu Carolyn sosega na paz.
Schlipken (ATA): Aruba y Colombia ta comparti lasonan di e.o. turismo, economico y comercial
BOGOTA - Na ocasion di 40 aniversario di A.T.A. na Colombia, director di A.T.A. Latino America, Jordan Schlipken a elabora riba e posicion importante cu Colombia tin pa Aruba y e conexion entre e dos paisnan. No tin ningun duda cu Aruba y Colombia ta comparti lasonan economico y comercial, cultural, di salud y mas cu claro - di turismo.
Altez: Fanaticonan rond mundo ta manda Joran vd Sloot placa tur luna
LIMA – E por ta cera den un prison teribel, y encarcela pa asesinato, pero asina mes e tin su fanaticonan rond di mundo cu ta mande placa tur siman, pa straño cu por zona. Hopi no por kere cu tin hende cu ta sostene, asabiendas di loke e ta cera pe y ta wordo sospecha ainda di dje. Otronan ta pensa cu aunke cu e ta cera, e ta keda un ser humano y cu e tin derecho pa tin algo di bida. Y a base di esey, e muhernan fanatico ta mande placa. E sospechoso principal di desaparicion di e Mericano Natalee Holloway, esta Joran van der Sloot, tin fanatico rond di mundo cu a mande un averahe di 400 dollar Mericano pa luna. Asina su abogado Peruviano Maximo Altez ta bisa. Segun e abogado, su cliente ta responde tur su fanaticonan femenino cu nan carta. “Tur su fanaticonan di henter mundo ta mande carta. Mi a huur un P.O. Box p’e pa e ricibi esey. Tin carta cu 10 euro, 20 euro, 5 dollar. Nan ta scirbie carta cu placa, y e ta contesta nan tur” Altez a bisa. Na tur mas of menos 400 dollar e ta ricibi tur luna di su fanaticonan.
E cantante legendario Tina Turner a fayece na edad di 83 aña
ZURICH – E cantante legendario Mericano Tina Turner a fayece diaranson na Suiza, na edad di 83 aña. E ta ganadora di por lo menos 12 premio Grammy’s, a presenta un carera musical electrificante pa mas di 5 decada y tabata adora pa su fanaticonan. Lo tin un entiero priva pa famia y amigonan cera di dje.
Follow NoticiaCla
