Croes: Gobierno no por ordena SKOA riba aumento di schoolgeld

ORANJESTAD – Gobierno di Aruba no por ordena SKOA pa cambia su maneho riba schoolgeld. Esaki pasobra SKOA  ta un fundacion cu tin su propio “directiva” unda un Gobierno of Minister no ta autorisa pa tuma decision. Esaki gobierno a informa den fin di siman riba e tema di aumento di schoolgeld. Loke cu gobierno por haci, ta  invita SKOA pa un reunion, pa asina por compronde miho nan necesidad kisas pa aumenta e schoolgeld. “Pues, e asunto di schoolgeld tin nos atencion, e mandatario a enfatisa”

AUMENTO

E mandatario a splica cu a tuma nota di e anucio di aumento di schoolgeld di SKOA. “Como Minister di Enseñansa y Deporte esaki sigur tin mi atencion”. Pero manera a splica anteriormente,  SKOA ta un stichting cu tin su propio “bestuur” unda un Gobierno of Minister no ta autorisa pa tuma decision. “Pues, tur stichting y tambe SKOA ta completamente liber pa tuma nan propio decision” e mandatario ta sigui bisa. E mandatario a sigui plica cu durante aña 2022, como Minister e a haci apelacion pa trata na no aumenta schoolgeld. “Nos ta compronde alabes cu rond mundo e retonan ta grandi, saliendo for di pandemia cu a asota nos na 2020. E siman entrante Minister di Enseñansa lo invita SKOA pa un reunion, pa asina por compronde miho nan necesidad kisas pa aumenta e schoolgeld. Pues, e asunto di schoolgeld tin nos atencion, e mandatario a enfatisa” e mandatario a sigui bisa. 

SITUACION NA SCOLNAN PUBLICO PA CU SCHOOLGELD

Minister Croes a splica tambe cu su persona como “bevoegdgezag” di scolnan di DPS, esta scolnan publico ta e unico caminda cu Gobierno y Minister ta 100% responsabel y por tuma tur decision. Pues, e mensahe a bay caba pa DPS cu bou ningun circunstancia no lo permiti pa scolnan cu ta cay bou DPS aumenta schoolgeld ni cu 1 florin. Alabes a pidi DPS pa traha mesora riba un plan strategico dado caso sinti e necesidad cu e peticion pa cupo na scolnan di DPS aumenta. Terminando, Minister Endy Croes a splica cu despues di e reunion cu SKOA lo informa comunidad di resultado di dicho reunion.