Renobacion di Compleho Deportivo Guillermo Prospero Trinidad a inicia dialuna

ORANJESTAD – E renobacion di Compleho Deportivo Guillermo Prospero Trinidad a inicia dialuna. Asina minister di deporte Endy Croes a informa. Segun e mandatario, durante fin di siman cu a pasa, e organisacionnan deportivo, entre otro, Arubaanse Voetbal Bond (AVB), Arubaanse Atletiek Bond (AAA), Centro Medico Deportivo Aruba (CEMEDAR) y House of Pain Gym a traha hopi duro pa aloha tur nan pertencianan na un otro edificio. A entrega e stadion completamente den man di e constructornan pa inicia cu e proyecto y aki ocho (8) luna ta entrega Fundacion Facilidadnan Deportivo (FFD) e stadion bek den un bachi completamente nobo. Manera ta conoci caba, ta planifica pa renoba, entre otro, e tribuna, dak, luz, tegels, VIP sector, yerba artificial y “atletiekbaan”. Pues, ta bay tin trabou grandi y esaki lo ta parti den fase. Durante prome siman di maart di aña 2023 lo tin un programa chikito, unda cu simbolicamente ta pone inicio di e renobacion di Compleho Deportivo Guillermo Prospero Trinidad cu desde aña 1994 no a haya un fachada nobo. Desde e luna di october di e aña aki, tur seleccion, “homegames” y wega di clasificacion di Concacaf por competi bek na cas.