Glenbert Croes: Zona di refineria lo bira parke industrial di industria di energia na Aruba

Glenbert Croes: Zona di refineria lo bira parke industrial di industria di energia na Aruba

Posted on 01/24/2023 3:06 pm AST | Updated on 01/24/2023 3:10 pm AST

ORANJESTAD - Minister Glenbert Croes e siman aki a indica cu na Februari, su persona conhuntamente cu Utilities Aruba NV y RDA lo biaha pa Hulanda pa asina firma un MOU pa e desaroyo di e prome Aruba Hydrogen Valley den Caribe. Tambe lo designa e zona den refineria cu lo wordo destina pa tur e proyectonan energetico. E zona di refineria lo bira e parke industrial di e industria di energia na Aruba reserva pa e zona di energia. Pa e zonanan cu ta keda disponibel, gobierno lo tuma decision riba e redestinacion di e terenonan ey. 

E siman aki durante e conferencia di prensa di Gobierno di Aruba, e minister a elabora riba loke Aruba ta haciendo den cuadro di e ekiponan cu ta den bon condicion na e zona di e refineria. Croes a splica cu durante su bishita na Ecuador conhuntamente cu sr. Edison Briesen a reuni cu Petroecuador riba e tema pa reactiva e ekiponan den zona di refineria cu ta den bon condicion, a base di technologia y combustibel limpi, gas y no a base di HFO. Pa loke ta trata e ekiponan den mal condicion, Minister Croes a indica cu nan lo wordo reemplasa. 

Minister Croes tambe a informa cu gobierno ta trahando actualmente riba e facilidadnan pa LNG y e trabounan ta bayendo hopi bon. Gobierno tambe ta den e proceso pa reactiva e parti di tanki, Terminal di Energia di Aruba (TDEA) y e partinan bon di refineria pa nan wordo reactiva a base di energia limpi y tecnologia moderno. 

Fuel Marketing Supply Aruba (FMSA) ta invirtiendo den mehora su infrastructura pa Aruba por "off load" gasolin, diesel, jetfuel y HFO. Bou di ningun circunstancia gobierno lo permiti pa pone na riesgo e siguridad den "energy supply" pa nos economia. Refineria Di Aruba (RDA) a traves di su board, su gerencia y riba recomendacion di gobierno di Aruba a urgi pa haci tur cos posibel pa sigura e integridad y confiansa den infrastructura energetico na RDA. 

  • Powered by SETAR