Dos funcionario di Ministerio di Hustisia na Corsou ta riba non-actief

WILLEMSTAD - Ayera atardi a bira públiko ku a pone dos funshonario di Ministerio di Hustisia riba non-aktif. Ta trata di Sekretario General Interino i Direktor Finansiero di Ministerio di Hustisia.

Esaki aparentemente ta relashoná ku sierto akuerdonan ku a keda será i firmá kaminda Wardakosta lo risibí algun mion euro èkstra destiná pa entre otro kompra di material. Total ta trata di un suma di 26.88 mion euro ku mester keda pagá na Wardakosta den 7 aña.

Minister di Hustisia Shalten Hato a indiká na EXTRA ku e no por duna ningun komentario mas, aparte di loke el a publiká riba su página sosial esta lo siguiente”:

Minister di Hustisia sr. Hato a pone Sekretario General Interino i Direktor Finansiero di Ministerio di Hustisia riba “non-actief”.

Esaki ta un medida di órden temporal i no un kastigu disiplinario. A inisiá ku un investigashon independiente enkuanto e dos empleadonan públiko aki i miéntras esaki ta andando lo no tin mas komentario di parti Minister di Hustisia riba esaki. Manera e investigashon ariba menshoná ser konkluí lo suministrá mas informashon.NOTA: E texto ta scirbi den Papiamento fonetico di Corsou.