A intercepta 2 boto drentando Aruba y a detene 23 indocumentado riba aña nobo!

ARASHI - Riba prome dia di aña un grupo di 23 persona indocumenta a purba burla di autoridad di Aruba, drentando nos isla di un forma illegal. Tabata radarkamer cu a detecta un boto for di oranan tempran di diadomingo mainta purbando pa drenta na altura di  Arashi. Mesora radarkamer y central di polis a cuminsa coordina y manda patruyanan di diferente districto pa yuda pa purba impedi hendenan por subi tera. 

Na e mesun momento e metalshark di Kustwacht a bay direccion di e boto y a intercepta esaki cu 2 hende abordo y ariba tera a detene en total 6 persona cu basta jerrycan y bultonan cu ta parecido na droga. 

SAVANETA

Na mesun momento radarkamer a detecta otro boto un paar miya pafor di Santo Largo.  Mesora a cuminsa coordina tambe pa patrouillenan y helicopter bay direccion di Santo Largo. E boto di Maritieme Politie tambe a bay den accion y a logra intercepta e boto aki. Abordo di e boto tabata tin 1 persona cu tambe tawata purba bay back direccion pazuid.  A cuminsa coordina conhuntamente cu helicopter di polis, coleganan di kustwacht, coleganan di Guarda Nos Costa, radarkamer y coleganan di diferente districto na Santo Largo. Mesora cu e prome 2 coleganan a drenta e mangelnan nan a pidi refuerso pasobra a bin encontra mas cu 10 ilegal scondi den e mangelnan. Poco poco helicopter a transporta mas colega di KPA y Kustwacht pa yuda y asina bin pone man ariba en total 14 ilegal. Ta trata di  13 hende homber y 1 hende muhe. 

ACCION FRUCTIFERO

E dos accion policial ak mismo momento a duna un tremendo resultado ariba e prome dia di januari 2023. E botonan a wordo intercepta door di coleganan di Kustwacht cu a drenta na Arashi. Aki a detene en total 6 persona y confisca un cantidad basta considerabel di droga. Cu e boto intercepta door di e coleganan di Maritieme Politie na ex Isla di Oro a detene en total 15 persona y rugtasnan confisca pa determina ainda precies kiko tin aden. Trahando den ekipo y cu un bon coordinacion, tras di pantaya, riba tera, den aire y riba lama polis por bisa cu e resultado di e accion tawata un exito y asina frena baho mundo den 2023.