Hospital Horacio Oduber y IMSAN a firma acuerdo formal di cooperacion

ORANJESTAD – Diahuebs den oranan di mainta a firma un acuerdo di cooperacion (MOU) entre Ministerio di Turismo y Salud Publico, HOH, ImSan y AZV. Minister Oduber a señala cu ta pa prome biaha den historia e instituto di HOH y ImSan ta bay traha hunto intensivamente.

Segun e mandatario, e MOU aki lo bay yuda na mehora e servicio y e calidad di cuido na Aruba, banda di esaki e MOU aki ta haci cu Aruba ta cumpli cu e Landspakket poni pa Hulanda. Cu e acuerdo firma aki HOH y ImSan ta bay traha hunto na un manera mas eficiente pa duna un mihor cuido na nos comunidad y pa mantene nos fondo di AZV sostenibel.

E firmantenan di e MOU  aki tabata Minister di Salud Publico Dangui Oduber, director di hospital HOH  Jacco Vroegop, director di IMSAN  sr Joel Rajnherc y e director AZV, Edwin Jacobs.

E mandatario a trece dilanti cu e ta contento di e profesionalismo y calidad di cuido cu HOH y ImSan ta duna na nos comunidad. Segun e mandatario, awor cu e acuerdo di cooperacion aki esaki ta bay mehora aun mas. E mandatario a sigura cu pa locual ta nos seguro medico general (AZV), esaki Aruba mester ta orguyoso di dje mirando cu nos ta un di e poco paisnan na mundo cu tin un seguro asina extensivo. “Hopi paisnan grandi y avansa no tin un seguro general manera esun di AZV”, e mandatario ta remarka.

E mandatario a papia tambe riba e retonan cu tin den Salud Publico, Aruba no tin e comunidad di mas saludabel. Tin hopi asegurado cu ta sufri di malesanan cronico. Nos tin “dubbele vergrijzing” y tambe ta existi e presion cu Hulanda a impone pa corta presupuesto di AZV cu ta den e Landspakket.

Minister Oduber a splica cu na januari di 2021 a duna e tarea pa haci un investigacion riba eficiencia, efectividad y financiamento di cuido na Aruba na professor Hubben y professor Batenburg. Na januari di 2021 a institui tambe un comision nacional di cuido cu a haya como tarea pa trece diferente recomendacionnan dilanti di con nan ta pensa cu nos por yega na e recorte di 60 miyon florin den cuido. A crea un Roadmap con y unda ta bay haci e reformanan necesario pa garantiza cu AZV ta keda sostenibel.

MIHO COOPERACION

Den lineanan grandi e MOU aki lo bay percura pa un mihor cooperacion den ambos instituto, un mihor cooperacion entre e personal esta e specialistanan cu ta traha den ambos instituto. Tambe pa brinda un mihor cooperacion na e pashentnan cu ta sufri di malesanan manera diabetes y dialyse. Pa traha mas conhunto den compra di remedinan, sistemanan y ekiponan. Tambe un mihor cooperacion den e sistema di IT.