Van Gaal: Conciente cu Merca lo no ta un ekipo facil pa Hulanda gana den mundial

DOHA – E entreador di e seleccion hulandes di futbol den mundial di futbol 2022 na Qatar, Louis van Gaal ta conciente cu e contrincante di Hulanda diasabra (Merca) ta un ekipo fuerte ‘cu tin chens’. Como tal van Gaal a sigura cu Hulanda lo no subestima e ekipo mericano. “E ta un ekipo fuerte cu hungadornan fisicamente fuerte, y nan por ta fastioso pa cualkier contrincante. Esey bo ta mira na e resultadonan”. Segun van Gaal nan lo tene tur esey na cuenta y haci tur cos pa gana e seleccion di Merca. E ta algo tipico mericano cu nan ta desaroya miho na caminda y ta crece. “Ta bisto cu nan tin chens. Mi tabata sa esey for di ora cu mi a wak nan prome partido” van Gaal a finalisa bisando. Hulanda ta topa Merca diasabra pa 11’or di mainta ora di Aruba.