OM: Sospechosonan di caso Avestruz no por ‘sconde’ tras di ‘cultura’ di Aruba

ORANJESTAD –  E echo cu sospechosonan di caso Avestruz ta sconde tras di ‘cultura’ di Aruba ta simplemente malo. Esey tabata e pensamento di fiscal mr Rethmeier diahuebs durante e tratamento di e rekisitorio di e caso penal Avestruz. Ademas por a nota cu basa riba declaracionan haci diahuebs pa e fiscal a mustra cu hasta acto y declaracionan haci pafo di corte durante e caso, ta wordo observa y nota y ta afecta nan den esaki. Esaki pasobra pa sorpresa porta di hopi, Rethmeier a referi na un declaracion cu e ex minister Benny Sevinger como sospechoso principal di e caso a haci na un radio local recientemente , unda cu e ta yama un fiscal di OM pa rasista y narcista. Y esaki no a cay den bon tera cerca OM. “Den un serie di atake personal riba Ministerio Publico y Landsrecherche, nos ta haya esaki si un punto baho”, Rethmeier a bisa. 

SCONDE TRAS DI CULTURA DI ARUBA 

E declaracionan di algun sospechoso incluyendo Sevinger, segun Rethmeier, ta mes ‘censurable como absurdo’. Aki e fiscal ta referi riba e aspecto di cultura y custumbernan di Aruba. E fiscal a tuma nota cu den comunidad y media, ta haciendo como si fuera e hecho cu mayoria di nan (e fiscalnan:Red)  ta hulandes europeo y como tal lo no por conoce e cultura y custumber di Aruba, cu esaki ta afecta nan forma di husga e sospechosonan. “Algun sospechoso ta declara cu nan accionan tin di haber cu e cultura di Aruba” e fiscal a sigui bisa. “ (Y) cu fiscalnan hulandes (di husticia) no ta compronde nada di esaki”. “(Sospechoso) Arends a declara durante e caso cu e hecho cu e la usa otro hende pa haci peticion pa haya tereno (erfpacht), esaki lo tin di haber cu politica. “Otro sospechosonan ta declara cu nan actonan no ta nada mas cu ‘yuda hende’ den e comunidad chikito di Aruba”, e fiscal a sigui bisa. “Nos no por pensa di ningun cultura,- unda cu ta na mundo -, cu e tipo di accionan aki ta wordo acepta. E soborno di un minister; Usa construccionan falso pa estafa un pais; Comete falsificacion di firma ; Malversacion. Sconde tras di e cultura y custumber di Aruba ta simplemente malo” e fiscal a continua bisando. E ta considera esaki dañino pa e comunidad y imagen di e isla di Aruba. E ta bisa esaki pasobra “door di declara esaki (cu ta cultura di Aruba:Red), e sospechosonan ta implica cu nan accionan,- accionan castigabel -, ta parti di cultura di Aruba”. Segun e fiscal, den nan (e sospechosonan:Red) intento pa evadi cualkier castigo, e sospechosonan no tin ningun problema pa hinca e comunidad completo di Aruba den un luz negativo”.

COMPORTACION DI SEVINGER Y OTRONAN

Segun e fiscal, Sevinger a bergonsa e confiansa cu a wordo poni den dje como minister. “Cu su accionan, e la demonstra cu e gobierno y e pueblo a confi’e eroneamente”. Segun e fiscal, a mustra tambe cu un gran parti di e sospechosonan tabatin un posicion prominente den comunidad. “E posicionan aki sinembargo no a stroba nan pa comete actonan ilicito. Mas pio ainda, nan a hustamente malusa e posicionan aki pa comete e actonan illegal aki. Nan ta haya cu e reglanan no a conta pa nan. Tur esaki Ministerio Publico ta tuma nan hopi na malo” e fiscal a finalisa bisando riba e parti aki.