Gobierno di Aruba: No a aumenta papel di 5 florin pa Censo

ORANJESTAD – Gobierno di Aruba a informa diabierna atardi cu contrario na e informacion cu a sali diahuebs ultimo, e papel di 5 Florin di Censo NO a aumenta. E Papel di 5 Florin, ta e documento di registro civil cu ciudadanonan di Aruba ta busca mas na Censo y na e MFA’nan. 

E extracto aki, popularmente a haya e nomber di ‘Papel di 5 Florin’ pasobra ta paga solamente 5 florin pe y esaki pa hopi aña ta asina y ta ancra den ley. Pa aumenta esaki y aumenta e suma pa 10 florin of cualkier otro suma, mester cambia ley. Y e cambio den ley aki lo no pasa. 

Gobierno di Aruba a bisa di ta lamenta e bruhamento cu por a wordo causa y e intrankilidad cu esaki a trece cu ne. Gobierno a sigura nos pueblo cu e tarifa di papel di 5 florin no a aumenta. E Papel di 5 florin ta keda Papel di 5 florin.