Ex director di AHATA, awor ta apunta pa bira director interino di CHATA na Corsou

WILLEMSTAD - Den kuadro di su direkshon nobo ku e ke bai, Chata a aserka James Hepple pa hasi uso di su ekspertisio. Esaki Chata ta informá su miembronan. E restrukturashon di Chata manera e direktiva a determiná, ta den progreso. E direktiva lo tuma pasonan pa asina adaptá direkshon di e asosashon pa kumpli mihó ku e eksigensianan di e miembresia, engrandese e posishon di liderato den komunidat, gruponan di interes i krese nan visibilidat internashonal ku focus riba merkadeo.

Pa asistí e direktiva den desaroyo di un plan stratégiko, sosteniendo Chata su vishon di un merkadeo dirigí, direktiva a buska e ekspertisio di James Hepple, direktor di merkadeo di Tourism Analytics, komo konsehero i direktor interim di Chata. Sr Hepple tin un eksperensia amplio den liderá tantu turismo públiko komo priva i organisashonnan di hospitalidat i Chata tin konfiansa ku e lo duna un gran kontribushon na e desaroyo di e vishon di e organisashon.

Chata ta rekonosé e kompromiso di sra Selina Maduro Gumbs, mènedjer di evento i operashon i tambe Crystal Willems, PR i mènedjer di edukashon, spesialmente durante di pandemia i ta deseá nan éksito den nan trabou nobo den sektor priva.

Pa por sigurá kontinuidat den e operashon di tur dia, direktiva di Chata ta anunsiá ku Jihan Fayad Hammoud ta bek komo mènedjer interim di ofisina.

Na mes momentu direktiva ta responsabel pa reklutá un mènedjer nobo i a aserka un kompania pa e proseso aki. Asina establesé e struktura di organisashon nobo lo saka e vakaturanan nesesario.

Durante di reunion di miembresia dia 24 di novèmber próksimo direktiva lo atendé e direkshon nobo di Chata i lo kontesta tur pregunta i preokupashon ku por tin. NOTA: Texto ta scirbi den Papiamento fonetico di Corsou.