Glenbert Croes: E noticia di Ecuador ta ‘desagradable’ pero ta sigui busca solucion

ORANJESTAD – Minister Glenbert Croes ta considera e noticia for di Ecuador, unda cu e awor ex minister di Energia Xavier Vera mester a retira, causando un paro na e deal cu e Vera tabata pa cera cu Aruba pa Heavy Fuel Oil mas barata, como  ‘desagradable’. Asina e la pone riba su pagina di Facebook den fin di siman aki. E hecho cu e mandatario a bisa e.o. tambe cu awor lo tin cu si busca otro solucion, ta indica tambe cu e deal cu Ecuador asina ta yega na fin. 

DESAGRADABLE

“Desagradable, pero nos ta sigui busca solucion pa nos pais y pueblo pa baha prijs di awa y coriente” e mandatario a pone riba su pagina di FB, y tambe usando e ‘hashtag’, cu ‘corupcion ta desgracia nos paisnan, refiriendo aki na e colega ecuatoriano cu mester a baha pa sospecho di corupcion. Algun siman atras, e mesun persona aki a cera un deal inicial cu Aruba pa yuda baha prijs di awa y coriente. 

KICO A PASAApenas un siman despues cu minister di energia di Aruba Glenbert Croes a bolbe di su biahe pa Ecuador pa busca Heavy Fuel Oil mas barata pa Aruba, (awe noticiacla a cuestiona cu tin hopi pregunta ainda pa cu e deal na caminda aki:Red), e minister ecuatoriano cu cual Croes a trata, ta bou di investigacion di husticia pa cual e mester a retira. Ta trata di e awor ex minister Xavier Vera, cu a aparece riba potret cu Glenbert Croes, dispuesto pa bende HFO cu Aruba mas barata. E pregunta ta si e deal cu e minister di Aruba a cera, por continua awor of ta un deal cu a keda ‘na arroz y coco”. 

ENTRADA HUDICIAL

Tabata apenas diahuebs siman pasa cu autoridad ecuatoriano a haci un entrada hudicial na cas di e mandatario, y confisca un cantidad di cos di e persona aki, relaciona cu un investigacion contra e persona aki pa actonan coruptivo. Varios medio ecuatoriano a raporta e noticia di e renuncia di Vera, cual renuncia e presidente Guillermo Lasso a acepta. Un declaracion interesante haci tabata esaki esta “Buena fe ta presumi, y mala fe ta prueba”, e minister Fransico Jimenez a bisa di e caso aki. 

APENAS DEN FUNCION

Mas informacion ta bisa cu e ex mandatario di Energia y Minas, tabata apenas 6 luna den funcion y for di momento di su entrada, tabatin un serio di denuncia contra su forma di traha, entre nan, tratonan cu companianan creando conflict di interes.