Arends: Mi a confia e abogado cu e lo a haci tur cos corecto

ORANJESTAD – Sospechoso L. Arends (caso Avestruz) ta culpa su mes pa a hay’e den problema legal aworaki relaciona cu e adkisicion di un tereno comercial (na Wayaca:red) . Asina e la bisa hues dialuna mainta ora cu a continua cu e tratamento di e caso penal Avestruz, di cual e ta un di e sospechosonan. Mientras Arends ta sigura cu e mes no a haci nada illegal, a basicamente culpa su consehero financiero A. Lin. y e abogado cu ,- segun Arends -, L. a usa abogado A. Ruiz pa atende cu e proceso di tereno. “Mi a sali di punto di bista cu e lo a haci tur cos bon” Arends a continua bisando. “Ta mi fout cu mi a confia cu (e) abogado a haci cos manera mester”. 

HUES TA CUESTIONA GANASHI RIBA UN OPCION DI TERENO

Durante e tratamento di e caso, e hues a repasa e proceso a cana pa e compania Deshaun NV ricibi e opcion di e tereno. E tereno a keda otorga na comienso di 2016 despues di a wordo solicita algun luna prome na 2015. Hues e ora a cuestiona cu ya na December di 2016, Arends a bende e tereno ey (cu e la haya pa un ‘waardeloos optie’, pa e suma di 356 mil florin. ‘Esey ta un bunita ganashi toch sra Arends?” e hues a puntra e sospechoso den un tono sarcastico. Arends e momento ey, a pasa pa splica hues pakico e la haci tal y pakico e suma ey tabata esun di e benta. 

CONSEHO DI LIN

Segun Arends, e ta un comerciante y cu comerciantenan ta haci negoshi. Pero segun Arends, ta e consehero financiero Lin ta esun cu a acerc’e cu e posibilidad y cu ta e ta esun (esta Lin:red) cu a recomenda e suma di placa aki pa e wordo bendi. Hues a mustra cu mientras cu e ta compronde, ta cosnan asina ta pone cu tin problema, esta e forma di haya un tereno como opcion, sin balor pa despues bira bende esaki pa un suma astronomico esta e concepto ‘winst maken met optierecht’. Aki Arends den su contesta na hues a implica cu e la actua simplemente loke un comerciante lo a haci: “Si un hende haci mi e oferta, mi mester bisa no e ora?” Arends a puntra e hues. 

PAGO SOSPECHOSO

E cos no a para aki, ya cu hues a cuestiona Arends cu ora cu e la ricibi e pago menciona pa e tereno, den tres paga, e la deposita 65 mil dollar y a transferi 30 mil florin riba cuenta di e prima di e minister, alegando posiblemente cu e pago ey lo tabatin metanan politico pa influencia e politico. 

ROL DI WINTERDAL

Dado momento, durante e caso, ora cu e sospechoso Winterdal a compone su mes y tabata por a cuminsa contesta pregunta, hues a puntre riba su rol den e compania. Aki e la bisa cu e tabata e director y tabata encarga pa deal cu DIP pa cu e tereno. Pero, ora cu a confronte cu p.e. esun cu a bin cu e oferta pa cu e tereno y a haci mencion di e persona en cuestion A. Lin, Winterdal a nenga cu e la topa y of reuni cu Lin, cu e hues a considera straño. A confronta Arends e ora pa cu e rol di Winterdal, unda cu Arends a splica cu a nombra Winterdal como director, pa motibo cu e tabata su persona di confiansa. Mes momento e la admiti si cu Winterdal no tabatin mucho conocemento pa cual e la usa su otro hendenan pa guia Winterdal door di e proceso. 

PROBLEMA CU POLITICA

Tambe a cuestiona Arends pakico e la opta pa e mes no bira director di e compania Deshaun NV y a opta pa pone un otro persona. Segun Arends, esaki e la haci pasobra e kier a evita mas problema cu metemento politico, ya cu e tabata cansa cu nan tabata lastre den prensa pa cu su coneccion cu e partido politico na mando ey. Esey pues a pone cu e la opta pa e mes no fungi como e director di e compania.