Norwegian Prima ta yega Aruba diasabra pa prome biaha

ORANJESTAD - “Despues di hopi luna di preparacion, nos ta asina leu porfin”, asina Marc Figaroa, director di Aruba Ports Authority N.V., a anuncia cu hopi orguyo. Esaki no ta e prome crucero cu ta yega nos waf pa prome biaha e aña aki y no ta e ultimo tampoco. “APA conhuntamente cu ATA y ministerio di Turismo ta trahando duro pa sigui atrae crucero nobo pa nos waf, den un esfuerso pa desaroya e industria y pa incentiva nos economia.”

Di acuerdo cu e plannan estableci y fiha den un itinerario, diasabra mainta trempan Norwegian Prima lo yega Aruba. E lo keda mara den nos waf te den oranan laat di atardi, ora cu e lanta anker pa sigui den direccion di su siguiente “port of call” riba su itinerario. 

“E ta e crucero di mas nobo di e famia di Norwegian Cruise Lines. E tin casi dos luna cu el a cuminsa nabega y nos a logra caba pa e bishita Aruba. Nos ta sper’e un biaha mas den e luna di november”, di acuerdo cu Marc Figaroa.