MEP: Debi cu MEP tin partner di coalicion, no por kita parkeermeter sin mas

ORANJESTAD – E siman aki gobierno di Aruba a admiti cu si nan a gana eleccion nan so, lo a elimina parkeermeter. Pero como cu nan no a gana eleccion nan so, nan mester ‘respeta’ e decision di nan partner di coalision (RAIZ) cu a dicidi cu ta continua cu e proyecto. Durante un conferencia di prensa di partido MEP, su lider Evelyn Croes a bisa cu e ta para riba su punto cu si ta pe, lo a elimina e parkeermeter, ripitiendo cu ta gabinete anterior di AVP (Mike Eman:red) a mata caya grandi y centro di playa. Di otro banda, mientras cu a priminti cu lo a kita e meternan, awor tin cu pensa con pa atende cu e asunt, sin causa ‘kapitaalvernietiging’, esta distribui placa gasta. E lider di e partido geel kier men cu, si bay ,kita e meternan sin mas, ta destrui material pa cual a paga hopi placa pe. Pues tin cu haya un manera con pa atende cu e asunto aki, sin cu e ta perhudica un grupo di trahado y e material cu ta inverti. Wever a bay asina leu di bisa cu ‘parkeermeter ta un di e cosnan mas cruel cu Mike Eman y AVP a haci cu centro di ciudad’. 

BUSCA BALANSA

Awor cu MEP a gana eleccion pero no su so y mester a busca un partner pa forma gobierno, e mester tene cuenta cu esaki y den e caso aki, busca un balansa, refiriendo na e decision di e partner RAIZ cu a anuncia cu ta bay rebiba e parkeermeter, mientras cu MEP no tabata kier. Cu esaki, MEP ta papia di balansa, pa kita di e ‘promesa’ cu nan a haci pa kita e meternan unabez nan forma gobierno. 

GOBERNA VERSUS CAMPAÑA

E tema ta trece na discusion e tema di campaña versus goberna unda cu durante campaña ta priminti tur sorto di cos cu ta pone un persona vota pa e partido. Pero despues ta resulta cu pa cualkier motibo, no por cumpli cu e promesa, mientras cu e votonan si e la haya debi na e promesa haci. Algun tempo atras, e ex lider di e partido Nelson Oduber a yega di bisa, ‘goberna ta un y campaña ta otro’, y esaki ta mustra di ta bin bek, den politica.