Minister no tin problema cu festival di Stichting Musica pasobra e ta di genero soca y no carnaval

ORANJESTAD – E eventonan cu Stichting Musica a anuncia pa tuma lugar na november, ta diferente cu durante carnaval. Asina e mandatario encarga cu cultura, y cu esaki tambe carnaval, esta Xiomara Maduro a splica noticiacla diabierna. “E biaha aki Musica kier organisa nan festival pafo di e periodo di Carnaval y pa esaki mescos cu tur otro festival di ranchera, vallenato, gaita etc mester pidi nan permiso pa esaki. Centro di Bario nan tin nan propio vergunning y mi no sa si nan ta cubri festivalnan tambe. Si nan ta cumpli cu e rekisito di seguridad muy probablemente nan lo haya nan vergunning” e mandatario a bisa. Ta trata di e prefinal di Caiso y Soca Festival. E final si ta tuma lugar durante tempo di carnaval esta despues di tres rey na 2023 aunke e fecha exacto no ta conoci. 

E FESTIVAL ANUNCIA PA STICHTING MUSICA

E festival al caso ta e Aruba Caiso y Soca Music Festival (ACSM) cu segun e Stichting Musica a informa diahuebs durante un conferencia di prensa ta tuma lugar otro luna. A anuncia cu a duna 3 fecha pa esaki, cuminsando 12 di November y cabando 26 di November. Notable ta cu ta reparti e festival den tres diferente bario di Aruba, esta Dakota. Playa Pabao y Brazil. 

CARNAVAL TA CUMINSA DESPUES DI TRES REY

Tabata algun tempo atras cu un post di e mandatario a crea un conmocion, bisand cu carnaval ta cuminsa despues di tres rey esta 6 di januari di e aña corespondiente. Hopi a interpreta esey como un prohibicion pa e actividad di Stichting Musica di e Festival di Caiso y Monarch. Pero manera e mandatario a splica awor, e ta considera e festival anuncia como algo ‘pafo’ di carnaval. 

PERMISO

Pa loke ta e declaracion haci di e mandatario riba Facebook refiriendo na ‘tres rey’, e la splica cu como minister di Cultura e la pidi Minister di Husticia pa e ‘algemene vergunning pa Carnaval’ bay aden 7 januari bay dilanti. “Normal durante e periodo di Carnaval, SMAC ta duna permiso na Musica pa organisa nan festival.   Como Minister di Cultura mi no ta haya prudente pa bay mete den programa di Centro di Bario” e mandatario a sigui bisa. “Musica ta bisa cu nan ta organisa festival di genero musical soca y no di carnaval.  Dus si bay bisa cu nan no por organisa esaki, e ora mester stop tur otro festival y fiesta cu no tin di haber cu fin di aña. Di e manera ey bo ta bay limita hende su libertad pa organisa y esey ta bay trece problema cune” e mandatario a sigui splica. Pues cu esaki, e mandatario ta mustra cu e no tin problema pa e festivalnan anuncia pa Stichting Musica tuma lugar, contal cu nan haya e permisonan necesario.