Bo por bula mas barata entre Aruba pa New York, cu di Aruba pa Corsou of Bonaire!

MIAMI – Mientras cu un pasashi entre Aruba y Corsou ta costa algo mas di 250 dollar awendia, pa 40 dollar mas durante e proximo winter (nov 2022-jan 2023) bo por bula di Los Angeles of New York te Aruba. E ta zona straño pero NoticiaCla a cai ariba dealnan cu ta ridiculamente barata pa rutanan mucho mas largo, y ta cu aeroliñanan grandi y ta boek nan via nan propio portal. Segun e portal 'thepointsguy.com' e aeroliñanan American Airlines, JetBlue, United Airlines, Delta Air Lines y Copa Airlines ta ofreciendo descuentonan grandi entre New York, Newark, Austin, Baltimore, Los Angeles, Minneapolis, New Orleans, Orlando, San Francisco y otro rutanan te na Aruba pa apenas 290 dollar. Tin cu book esaki usando Google Flights y despues boek directamente via e portal di e aeroliña y tin cu boek dentro di tres dia. 

BUELONAN LOCAL

E asunto ta algo hopi tempo comenta caba, unda cu no por kere con caro bulamento a bira entre e islanan ABC p.e. Un buelo di Aruba pa Bonaire p.e. na December di 2021 ainda tabata costa casi 400 dollar pa persona, mientras cu un buelo entre Aruba y Corsou ta costa casi 300 dollar (258.00) pa persona. Pues pa casi 40 dollar mas, bo por bula di Aruba te Los Angeles of New York. 

PAKICO NOS TA MAS CARO

Un di e motibonan cu e pasashi entre islanan ABC ta mas caro, ta debi cu e operacion pa e buelonan ta mas caro. E tipo di avionan hopi biaha cu ta usa, nan operacion ta rekeri mas placa, y no ta efectivo pa e distancia cortico cu nan ta bula. Esey ta haci cu e ruta no ta hopi rendabel riba un prijs mas barata. Y como tal pa por genera algo di ganashi, ta aumenta e tarifa di tal forma, cu ta pone cu e tarifa final cu e consumidor tin cu paga, ta mas caro. E prijs di gasoline pa e avion ta hopi caro, e mantencion di e avion, y tambe ultimo tempo e impuesto di salida cu a bolbe aumenta, no ta yuda e causa. Tur e aspectonan aki ta pone cu e prijs dificilmente por ta mas barata y cu ta mustra awor cu bula pa un destinacion mas leu cu un aeroliña mas grandi, ta mucho mas barata cu bula distancianan cortico.