Oficina di turismo di Aruba ta agradecido y orguyoso di ‘KLM Huisje 103’

ORANJESTAD - Pa conmemora KLM su 103 cumpleaños a devela e casita 103 di Koninklijke Luchtvaart Maatschappij. Remarcabel ta cu e casita aki ta e di 2 casita na mundo cu no ta situa na Hulanda y cu casita 103 ta e prome casita na Aruba.

KLM ta un aerolinea importante pa nos isla y ta conecta nos cu Hulanda pero tambe otro destinonan den Europa entre otro Alemania, Belgica, Italia, Scandinavia y Reino Uni, mercadonan unda A.T.A. ta enfoca y inverti pa asina por sigui expande bishitantenan for di e mercadonan aki. Entre 2011 y 2021 e mercado di Europa a crece cu un averahe anual di 4%. Den e mesun periodo e averahe anual di bishitante for di Hulanda cu a yega cu KLM tawata 59% y e averahe anual di bishitante di Europa cu a yega cu KLM tawata 35%.

E relacion cu KLM ta uno fuerte unda tin contacto estrecho entre A.T.A. basa na Aruba y na Europa y KLM cu reunionnan frecuente. E relacion ta fuerte tambe sigur entre otro socionan importante na Aruba manera AAA y hotelnan cu KLM. E relacion aki ta haci posibel pa crea oportunidadnan nobo pa mercadea Aruba tambe conhuntamente cu KLM den diferente mercado di Europa a traves di por ehempel e Real Deal Dagen di KLM, KLM Holidays, diferente newsletters, campañanan riba medionan social, como tambe eventonan cu consumidornan y tambe agentenan di viahe.

Mirando e importancia di KLM, su legado, y e relacion estrecho cu tin ya pa hopi aña caba, e hecho cu e cas di famia Ecury, un monumento riba nos isla, a wordo escogi como casita 103 sigur ta yena nos cu satisfaccion. Esaki no ta djies un casita, e ta muestra di un relacion estable cu ainda tin un potencial enorme pa sigui crece y e casita riba su mes ta crea oportunidad pa nos por sigui mercadea Aruba na e bishitante afluente, manera ta nos strategia. 

Miembronan di categoria Flying Blue Elite cu ta nivel di miembrecia mas halto di KLM lo wordo exponi na e casita aki, na e historia di e casita, e historia di Boy Ecury como tambe na informacion adicional di nos destino. Casita 103 ta sumamente importante pa nos como isla pero sigur tambe como destino turistico! 

A.T.A a gradici tur persona y organisacion cu a haci posibel pa casita 103 por a wordo devela.