Cu cambio di aña pa 2023, tarifa combina nobo di BBO ta bira 7%

ORANJESTAD – Riba cambio di aña, e asina yama Plan di Impuesto 2023 di gobierno di Aruba ta drenta na vigor. Esak ta nifica cu pa e fecha ey, e tarifa combina di BBO ta cambia pa 7%. E mandatario encarga Xiomara Maduro a sigura cu e plan   tin como meta pa yega na un sistema fiscal mas simpel y husto. Aki e ta referi na e hecho cu mientras ta aumenta e tarifa combina di BBO, ta bin compensacion y reparticion husto pa e mehoracion di cumplimento di impuesto di ciudadano y bishitante. 

CONCRETO

E plan concreto ta encera yn introduccion di un tarifa nobo di BBO cu ta resulta den un tarifa combina di BBO, BAVP y BAZV di 7%, hunto cu un pakete di compensacion pa individual y negoshi pa yuda mitiga e efectonan di inflacion. E pakete di compensacion individual ta conta cu un rebaho di 2% riba impuesto di entrada, lo subi e suma liber di impuesto na 30.000 mil florin, lo separa e cobransa di impuesto riba entrada pa pensionado y lo hisa e 'reparatietoeslag' pa pensionado di SVb cu 45 florin. Segun e mandatario, tur esaki ‘lo yuda baha e peso di impuesto riba esnan mas vulnerabel den comunidad’, cual ta nos grandinan y ‘esnan cu ta ricibi un salario cu ta menos di 2500 florin pa luna’. Ademas e mandatario a anuncia cu pa negoshi lo reduci e 'winstbelasting' di 25 pa 22% y lo mantene e 'investeringsaftrek.' 

AUMENTO PA TURISTANAN

Nos bishitantenan (incluyendo turistanan) lo conoce un subida di e 'toeristenheffing' y Maduro a sigura cu lo reparti e fondonan aki na un manera mas husto entre ATA, Gobierno y e fondo di TPEF cu ta pa mehora nos producto turistico. E plan ta conta tambe cu algun cambio pa asina mehora e cumplimento cu e deber fiscal na nos Pais. E mandatario ademas a sigura cu durante full e siman aki e lo brinda informacion riba e contenido concreto di e 'Plan di Impuesto 2023' cu ta drenta na vigor 1 di januari 2023.