• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Wendell Bennett a cumpli 50 aña di servicio den MetaCorp

ORANJESTAD - Awendia empleadonan no sa keda traha hopi aña pa e mesun compania. Nan ta duna e miho di nan pa algun tempo y despues ta fada y ta busca un otro “challenge” den nan carera. Wendell Bennett a busca e mesun “challenge” aki den e mesun compania, MetaCorp, durante no menos di 50 aña largo. Manera e mes ta bisa 50 aña ta nifica hopi sacrificio, trabao duro, lealtad y perseverancia. Pa Bennett ta manera ayera, el a conta.

CABA SCOL, BUSCA TRABOU Y HAYA TRABOU

E ta corda cu tempo el a caba scol, e tabata buscando trabao. El a solicita na refineria, pero no a tum’e. El a solicita pa polis dos biaha, pero pa un of otro motibo e no a logra. Wendell a haya trabao na Wescar cu a wanta net un dia pasobra a mand’e traha como pion riba waf na Playa. Mientras cu e tabata traha na waf, el a mira e trucknan cora di De Veer y forklift y el a bisa su mes cu esey ta loke e kier sigui haci.

E mesun dia ey, parti atardi, el a puntra e trahadonan, unda por haya un trabao cu nan ta haci. E trahadonan a bis’e p’e bay na De Veer Theater ariba y puntra pa Eduardo de Veer. Bennett ta corda con el a subi ariba y a drenta y den menos di 15 minuut despues di e entrevista, a bis’e cu e por a cuminsa traha su siguiente dia. E mes a keda sorprendi di e resultado. Wendell a kita fo’i Wescar y a cuminsa traha 50 aña pasa cu De Veer Transport.

A CUMINSA TRAHA BOU PALO

Wendell a cuminsa cu 20 aña di edad como mechanic helper, literalmente bao palo. No tabatin garashi bunita manera aworaki. Asina nan tabata bay aki aya y ora tin mester di un hende riba forklift, Wendell tabata bay yuda riba waf. Tempo cu el a cumpli 21 aña, el a saca su rijbewijs. El a prepara p’e. Despues di a saca su rijbewijs, el a cuminsa practica riba e trucknan. Un dia De Veer a gar’e ta reverse un truck carga den un luga preta. E siguiente siman, De Veer a mand’e LAGO pa traha den refineria.

DI ARUBA PA BONEIRO PA VENEZUELA

Despues di cuater luna trahando eynan, trabao a habri na Boneiro y el a bay. Despues De Veer a cumpra un compania na Corsou yama ATO, unda cu a mand’e traha eynan. Despues De Veer a haya contract di G.E. pa manda container Punto Fijo, via Puerto Cabello pa Valencia y Caracas. Wendell tabata un di e chauffeurnan ey. Lastimamente el a haya un accidente grave, unda cu el a kibra rudia y djente cu e no por a sigui mas. E persona cu tabata haci e trabao di checker e tempo ey, a fayece. A purba di cultiva otro empleado pa haci e trabao ey pero no tabata logra manera debe ser. A acerca Wendell despues di dos luna drumi na cas, despues cu el a sali fo’i hospital y a pidie si e ta dispuesto pa bay traha como supervisor checker/dispatcher, cual el a tuma e reto.

SIGUI STUDIA PA CARGA MAS RESPONSABILIDAD

Despues cu el a mira cu su direccion ta cambiando, el a bay bek scol anochi y a cuminsa tuma curso. El a cuminsa prepara su mes pa loke tabata na caminda. Wendell a subi di supervisor pa manager, pa Operations Manager y asina e compania a cuminsa crece y e hunto cu ne, te cu e Managing Director, Rudolph Richardson, a haya problema di salud y Wendell a bira director interino raportando na De Veer/MetaCorp. Tur aña ta pone fiesta bispo di Pasco y a invita fo’i su famia. De Veer a anuncia cu desde prome di januari Wendell lo a bira e Managing Director di ATCO y asina el a bira e Managing Director di ATCO te dia cu el a prepara pa baha cu pensioen.

UN DI E UNICO GERENTENAN CU A MANEHA PRACTICAMENTE TUR COMPANIA DI METACORP

Sinembargo, na aña 2010 un biaha mas a bati na su porta cu un otro reto p’e…e biaha aki na Brouwerij Nacional Balashi. A bel Wendell riba un diabierna y a inform’e cu desde dialuna e mester tuma maneho di e compania over. Di un industria di heavy equipment y mecanico, a bay pa produci cerbes y refresco. Wendell a comenta cu e mester a percura pa esunnan cu ta traha e productonan aki, e guia nan y percura pa e trabou ta haci. Ora cu el a kere cu ta pa algun luna, a tuma cinco aña y tres luna prome cu a haya un otro persona pa reemplas’e. 

Despues di esey, a haya problema na New York Laundry y a pidi Wendell p’e bay eynan te ora cu haya un hende. Esey a dura dos aña. Wendell a splica cu despues di New York Laundry, el a bay Ecogas y Ecotech tambe pa algun tempo. De facto, e echo cu por a mand’e traha na tur e companianan aki, ta pasobra cu e ta un di e poconan cu conoce e cultura di MetaCorp y di Eduardo de Veer den su plant’i man. E ta un di e poconan cu a studia na e Universidad di MetaCorp den cual integridad, respeta e trahado y bay tras di tur oportunidad di negoshi, ta resalta.

PASANDO SU CONOCEMENTO PA E HOBENNAN

Desde december Wendell ta duna un man y p’e ultimo 6 pa 8 aña, e ta inspira e trahadonan nobo en particular. E ta purba di motiva e trahadonan y purba di haci nan un miho trahado di locual cu nan a cuminsa cu ne. Esey ta practicamente loke cu Wendell ta haciendo pa MetaCorp den tur compania. E ta disfruta loke e ta haci p’e compania. E no tin un responsabilidad di director mas, pero e responsabilidad a bira mas grandi pasobra e ta un reto pa haci e hobennan awe un bon trahado.

WENDELL TABATEY DURANTE MITA DI EXISTENCIA DI METACORP 

Eduardo de Veer, presidente di e Hunta di Supervision di MetaCorp, tambe tabata presente durante di e evento dedica na Wendell Bennett. El a recorda varios aspecto di e trayectorio largo di Wendell, entre otro na momento cu el a solicita 50 aña pasa, te awo. “E carera di Wendell ta impresionante. E ta conoci paden y pafo di MetaCorp. E ta un di e icononan di e compania, representa pa su balor y principionan”, asina e doño di e compania netamente Arubiano cu mas di shen aña di existencia, a conta na Balashi Beer Garden.

Segun Eduardo de Veer, cu semper Wendell tabatey unda cu ta expande e compania. Y te ainda esey t'e caso. Wendell ta cay para riba su pianan y sa e cultura y ta yuda prepara e hendenan pa yuda planta y cosecha riba cultura di e compania aki.

“E ta un persona cu ta hopi honesto, trahado duro y por confia riba dje cu si entreg'e un proyecto, cu e ta hinca e bala ey den gol. Esey ta Wendell.”

Eduardo de Veer a termina bisando cu e por gaba cu den e compania MetaCorp y su subsidiario, tin un solo Wendell Bennett. E tabata un factor importante den henter e carera di MetaCorp. Mita di e 100 añanan cu MetaCorp ta existi, mita di nan Wendell tabat’ey 'al pie del cañon", leading the troops!

Ta bon pa menciona acera cu, despues di Eduardo de Veer, cu tin algun aña mas di servicio, ta bin Bienvenido Alberto na Tropical Bottling Company y su tras mesora Wendell Bennett ta e trahado cu mas aña continuo di servicio. Semper e ta cla pa bay cu pensioen, pero ki ora presenta un reto den compania, e prome persona cu ta pensa riba dje pa atende y soluciona e reto, ta Wendell.

YIU ORGUYOSO DI SU TATA

Yiu homber mayo di Wendell, Rene Bennnett, tambe a hiba palabra na honor di su tata cu a cumpli 50 aña trahando pa MetaCorp. Ta cinco decada, mita siglo di trabao duro, sodo y lagrima. Pero mas importante, lealtad no solamente fo'i su tata, pero for di e prestigioso compania MetaCorp. Su tata stima loke e ta haci y ta dispuesto pa comparti su conocemento pa esun cu kier scucha. Rene Bennett a sigura cu su tata Wendell a hunga un rol hopi importante den carera di hopi empleado di MetaCorp y esey ta bisto.