AAA: Buelonan for di Florida pa Aruba ta cancela debi na horcan Ian

ORANJESTAD/MIAMI – Buelonan for di estado di Florida (USA) pa Aruba awe a keda cancela. Asina aeropuerto Reina Beatrix ta raporta. E motibo di e cancelacion ta e yegada di e horcan destructivo Ian (mesun cu a pasa Aruba como un depression tropical un siman pasa). Ta trata di un buelo di Orlando cu Southwest Airlines buelo 1443 ( y su regreso SW 1641) y e buelo di Miami di American Airlines AA 1028 y e regreso AA 152. E horcan awe mainta tabata preparando pa subi tera na e parti west di e estado, casi como categoria 5. Aunke cu e ta subi tera na e parti west, debi na su grandura, e ta cubri casi full e estado, incluyendo Orlando y Miami, pa cual a tuma tur precaucion. Ta premira cu pa diahuebs y diabierna tambe e buelonan di Florida pa Aruba lo por keda cancela. 

ARUBIANONAN NA FLORIDA

NoticiaCla a confirma cu tin (tin mas si) un grupo di rubiano na Florida (Orlando) pa un casamento cu tin cu tuma lugar e siman aki y tabata programa pa diahuebs. Esaki sinembargo a keda posponi pa diasabra awor. Ademas a prohibi nan (tur hende) pa sali for di nan cas awe debi na e efecto di e horcan. Asina tin mas rubiano cu ta na Florida awor cu lo sinti e efecto di e horcan.