Minister Geoffrey Wever a introduci ‘vestigingsbeleid’ completamente modernisa

ORANJESTAD – E siman cu a pasa, manera ta conoci minister di Asuntonan Economico Geoffrey Wever a introduci e asina yama ‘vestigings beleid’ completamente nobo. Esaki tabata un di e top prioridadnan tabata pa trece un cambio na e vestigingsbeleid, y asina reduci rekisitonan y simplifica e proceso pa habri un negoshi, asina conoci como “red-tape”. E mandatario tabata contento cu den un aña di gobernacion, e parti aki a keda cla, unda cu awor e proceso pa haya permiso pa establece negoshi ta simplifica y digitalisa, y reduci.

TARDA

Pa hopi aña comerciantenan, entrepreneurs y start-ups tabata encontra contratiempo den e proceso di haya permiso pa habri un negoshi. Pa hopi aña profesionalnan local y internacional a vocifera cu e condicionnan burocratico pa habri un negoshi ta stroba progreso economico di Aruba. Desde cu Minister Wever a asumi e funcion di   Minister di Asuntonan Economico, e la revisa tur e rapportnan traha pa profesionalnan y a pidi input di tur stakeholders over sugerencianan pa elimina “red-tape”.

META

E meta di e modernisacion di e maneho pa permiso di negoshi, e asina yama Vestigingsbeleid, ta pa: elimina “red-tape”, stimula mas negoshi pa habri na Aruba y asina crece Aruba su economia y crea inversion, cuponan di trabou nobo, spin-off economico y aumento di entrada pa caha di gobierno. E maneho pa permiso di negoshi lo drenta na vigor entrante 1 oktober 2022.

CAMBIONAN

E cambionan principal den e Vestigingsbeleid 2022 ta: reduccion di “red-tape”, digitalisacion completo, ampliacion di categoria di persona cu no mester pidi un permiso mas, stimula inversion den centro di Oranjestad y San Nicolas, stimula diversificacion di Aruba su economia atraves di e “six promising sectors”, duna companianan chikito posibilidad pa establece den nan cas (zona residencial) y introduci pa prome biaha principionan di sostenibilidad den e maneho.

Minister Geoffrey Wever: “Mi ta spera cu e tipo di cambionan structural na maneho di permiso ta duna comercio animo pa sigui inverti, traha y haci negoshi. Economia di Aruba mester di mente creativo y e espirito empresarial di nos hendenan!”