Caso Avestruz ta inicia awe y ta programa pa dura 3 luna

ORANJESTAD – E caso penal Avestruz cu sospechoso principal, parlamentario Benny Sevinger, lo cuminsa awe mainta 11’or 2022 y caba mitar di luna di December 2022. Y mas probable, prome siman di 2023 por spera un sentencia. Segun e schedule, e caso ta cuminsa awe 5 di September pa 2022 pa 11’or di mainta unda cu segun palabracion haci, tur sospechoso lo mester ta presente. No ta sigur si esaki ta e caso mirando cu awe mainta a bisa cu e caso di awe lo ta regie zitting. Mientras cu no ta conoci con largo esaki lo dura, mirando cu ta regie zittig, a bisa biaha pasa cu e lo dura henter dia unda cu lo trata e situacion ‘al tiempo’ y ta reserva dia 6 di September si mester mas tempo. 

CASO FUNDACION FCB

Riba 7 di September 2022, sospechosonan Susebeek, Harms y Sevinger mester presenta cuminsando pa 8’or y mei y ta premira cu esaki ta caba dia 8 di September. 

OCTOBER CASO ELENATH y DESHAUN

Avestruz ta tuma un ‘break’ y fin di October, 24, 25 y 26 di October 2022, sospechosonan Arends, Richardson, Winterdal, Every, Abath y Sevinger mester presenta for di 8’or y mei. E caso lo dura 3 dia y ta termina dia 26 di October. 

NOVEMBER CASO DAMIRA

Avestruz ta bek dia 3 di November (un siman despues) pero e biaha aki e sospechosonan Nunez, Werleman, Mansur, Abath y Sevinger tin cu presenta pa 8’or y mei y e caso ey lo dura 2 dia y termina pues dia 4 di November. CASO BUCUTIUn siman despues, dia 9 di November ta trata e caso BUCUTI, unda cu sospechosonan Biemans y Sevinger lo mester presenta. E caso aki lo tin duracion di solamente un dia.

CASO LABAMENTO DI PLACA Y MALVERSACION

Dia 10 di November lo trata tur otro asunto cu ta regarda labamento di placa y malversacion pa sospechoso Sevinger. Y esaki ta termina merdia dia 11 di November 2022.

CASO TA SIGUI DECEMBER 2022

Hues ta reserva siguientemente 3 dia e siguiente luna, December 2022, unda cu riba 12 di December ta presenta tur sospechoso di nobo di e caso Avestruz, unda cu ta trata e aspecto personal, y dia 14 di December, lo tin e ultimo palabra pa despues cera e caso y pone un fecha pa e sentencia final. Notable ta cu no a pone un fecha pa esaki, cu normalmente ta tuma entre 2 pa 3 siman. Esey ta nifica cu pa sea fin di e aña aki of comienso di 2023, lo tin un sentencia riba e caso grandi aki. Por click AKI pa haya e schedule completo.