Encuesta: Usuarionan ta dividi pa decisionan tuma pa Gabinete Wever Croes

ORANJESTAD – Usuarionan cu ta lesa noticiacla ta dividi pa cu e decisionan cu Gobierno di Aruba (GOA) a tuma ultimo tempo, cu ta varia di e decision di no introduci BTW mas, te na esun pa no cobra impuesto riba tips y tambe esun pa paga 5% back di e recorte salarial aunke cu Hulanda no a duna su aprobacion. Den e encuesta aki un total di 741 persona a participa den tur 6 districto, di edad entre 18 y 65 plus. Pa dos di e preguntanan so, a score mas cu 60% di aprobacion pa e decisionnan tuma. 

BTW vs BBO

E encuesta ta cuminsa cu e decision mas recien di GOA cu a dicidi cu no ta introduci BTW mas como e forma di impuesto indirecto, pero cu ta aumenta BBO cu entre 1 pa 1% y mei. Aki 47% a bisa cu nan ta contra e decision aki, mientras cu 30% a haye un bon decision. 22% no tabatin suficiente informacion pa dicidi y 1% no kier a opina.  

GREMIO Y SINDICATO CONTRA GOBIERNO

Tambe tabatin un pregunta riba e hecho cu gremio comercial y un grupo di sindicato a forma un bloke di 17 y a dicidi cu nan kier pa GOA para tur introduccion di reforma riba impuesto na comienso di 2023 te ora cu tin miho bista riba e efectonan. Aki un cantidad di 61% cu a participa, a haya esaki un bon idea mientras cu 21% ta haya esaki un mal idea. E resto ta reparti entre esnan cu no por a dicidi pa falta di info, of ‘no tabata interesa. 

NO TRECE TAIRANAN PA DUMP MAS

Un desicion cu a ‘score’ bon tabata esun di GOA cu ta prohibi pa trece taira pa e Dump na Parkietenbos. Aki 66% ta haye un bon idea mientras cu 23% ta haye un mal idea. Esaki ta un di e decisionan pues cu mas sosten a haya. Esaki por resona den e pensamento cu esaki lo por evita ‘mas candela’ di taira na dump y porta pesey a sostene esaki mas hopi. E resto ta reparti entre esnan cu no por a dicidi pa falta di info, of ‘no tabata interesa.

DIVIDI RIBA IMPUESTO RIBA TIPS

E siguiente decision recien di GOA pa no cobra impuesto riba tips tabata uno dividi. Un cantidad di 55% a aproba e decision aki, mientras cu 37% ta haye un mal decision. Aki por corda cu tin un division entre e sector laboral cu a brasa e decision y e gremionan comercial cu no tabata positivo riba e idea aki. E ta un di e acuerdonan cu Aruba y Hulanda tabatin, pero cu a wordo cambia awor. E resto cu a vota, ta reparti entre esnan cu no por a dicidi pa falta di info, of ‘no tabata interesa.

PAGA 5% TOCH CONTRA DECISION DI HULANDA

E decision recien di GOA cu mas a hala atencion, ta esun unda cu GOA ta bay liña recta contra Hulanda y ta dicidi pa paga trahadonan publico 5% bek di e parti cu a revoca durante tempo di pandemia. Por corda cu Hulanda no tabata kier (ainda) pa paga esaki bek, y ora cu premier di Aruba a bay Hulanda y haya un no di e secretario di estado van Huffelen, e mandatario di Aruba a dicidi cu ta paga esaki toch. E decision aki a keda aproba pa 52% di esnan cu a contesta e pregunta aki mientras cu 37% a bisa cu nan no ta hay’e un bon idea pa a paga contra aprobacion di Hulanda. E resto cu a vota, ta reparti entre esnan cu no por a dicidi pa falta di info, of ‘no tabata interesa.

GOBERNACION ACTUAL OF ZAKENKABINET

E ultimo pregunta di e encuesta tabata un pregunta ‘bonus’. E ta midi e situacion actual cu GOA ta aden aworaki. Mientras cu lo elabora riba esaki den un raportahe mas elabora, aki tambe Aruba tabata dividi riba e opcionan y e dos opcionan cu mas a haya atencion tabata e opcion pa cambia e actual gobierno pa un ‘zakenkabinet’, y esun di e gobierno actual. Un 42% ta prefera pa cambia e gobierno actual pa un ‘zakenkabinet’ mientras cu 32% ta scohe pa e gobierno den su constelacion actual. Entre esnan cu a participa, 18% a scohe pa e opcion di ‘eleccion nobo’ mientras cu e grupo mas chikito di tur, 8% ta pidi pa un gabinete nacional, esta uno unda cu tin participacion di tur e partidonan cu a haya asiento den e ultimo eleccion. 

DISCLAIMER

Manera semper, e resultado di e encuesta aki, ta pa metanan puro noticioso. Ademas, tambe, no ta pretende cu e resultadonan obteni ta un refleho di Aruba completo, sino di usuarionan cu tin aceso na e portal noticiacla. Un total di 741 persona a participa na e encuesta (e mester ta minimal 500 pa por tin un representacion), di cual mayoria tabata hende homber den e caso aki.