Casi 10 ora despues di e candela na Barcadera, situacion a ‘normalisa’ bek

BARCARDERA – Despues di casi 10 ora cu e prome anuncio di e candela na Barcadera a bin, e situacion cu a surgi diamars riba tereno di e compania di reciclahe Daltra Antilles NV a ‘normalisa. Oficina di calamidad den careda di cuarto pa 10 diamars anochi a informa cu “e situacion tabata bou control,y cu ciudadanonan den bisindario di Ser'i Teishi, Simon Antonio. Bucuti, Cas Paloma y Mahuma cu a evacua por a debolbe nan cas bek’. Prome cu esey, tabata mas of menos 3 ora prome, cu DVG a conseha e bisindario di Mahuma y Ser'i Teishi pa evacua temporalmente. Awe tur hende ta trankil cu e situacion ta bou di control y cu nos a evita un posibel desastre grandi. 

E ANUNCIO

Tabata algo despues di diamars merdia cu central di polis a haya un raportahe cu tabatin un auto bieu riba tereno di Daltra na candela. Rapidamente e candela aki a expande riba mas parti di e tereno cu tabata yen di material di reciclahe, cu a yuda alimenta e candela pa e por a bira uno feroz y mahos. Varios unidad di bombero a combati esaki pa por lo menos 5 pa 6 ora, usando hasta awa di laman pa logra domina e candela. 

ALEHA

Dado momento despues di dos ora a haci e peticion pa tur hende cu no tabata combatiendo e candela, pa aleha por lo menos 500 meter di e sitio, pa seguridad propio. Esaki debi cu tabata teme cu e candela por a expande cualkier banda y asina pega e lugarnan p.e. Apex of Arugas (cu varios tanki di gas) na candela cu tur e consecuencia. E biento a coopera cu esaki no a bira un problema y tambe cu e bon coordinacion di esnan cu a bringa e candela, for di bombero te personal di DOW, esaki a logra keda contene. 

CONTROL Y EVACUACION

Den careda di 6’or di atardi a anuncia cu e candela ta bou di control, pero ainda cu peliger di huma toxico pa e besindario. Como tal a opta pa evacua esnan den e bario pa bandona nan cas temporalmente na bienestar di nan salud te cu 9or di anochi. Principalmente ciudadanonan cu tabata sufri di malesanan respiratorio tabata prudente pa nan bay keda cerca familia of amistad temporalmente. Esaki debi cu biento ta ocacionando cu e fuma conteniendo material toxico ta bayendo den direccion di casnan habita. Despues di 3 ora di e anuncio ey, e situacion a normalisa.