Cinco sindicato y OPPA lo reuni durante ora di trabou awe

ORANJESTAD – E grupo di 5 sindicato y OPPA bringando pa e asunto di revocacion di porcentahe di salario, ta bay reuni cu tur nan miembronan diahuebs atardi pa asina stipula nan siguiente punto di accion, kico cu esaki por ta. Esey e sindicatonan a bisa den un conferencia di prensa breve diaranson mainta laat. E sindicatonan a informa cu nan ta opta pa e direccion aki, cu ta mas practico e momentonan aki. E sindicatonan a sigura cu nan tin basta informacion pa suministra pa nan miembronan y como tal a pone 2 ora pa haci esaki. 

FIN DI LUNA

E sindicatonan a exigi pa gobierno inclui e pago completo di e asina yama reparatietoeslag di casi 2000 florin den e salario di e luna aki di augustus (2022), como cu nan ta calcula cu gobierno tin e forma pa haci esaki segun nan informacion suministra. Gobierno a contesta cu nan no ta bay haci esaki sino mas bien ta para riba nan punto original di paga e resto di placa na comienso di 2023, segun presupuesta. Sindicatonan a bin bek cu un contesta negativo y a insisti cu nan kier e pago aworaki mes, esta fin di luna. E relacion entre e sindicatonan y gobierno no ta esun di mas miho, no obstante e hecho cu gobierno, sin aprobacion di Hulanda, a opta pa paga 5% bek di salario na e trahadonan. NOTA: Potret ta di archivo di noticiacla.