Encuesta: Paga debe y inverti placa ta popular si gana e premio miyonario di Lotto

ORANJESTAD – Manera por a spera, mayoria di persona cu a participa na e encuesta mas recien di Noticiacla, a bisa cu si nan gana e premio miyonario di 2.8 miyon florin, nan lo paga nan debenan actual (cas, auto etc). E grupo aki tabata 56% di e 391 persona cu a participa na e encuesta cu a dura 2 dia. E resultadonan otro tambe tabata interesante. Awe nochi bo tin pues e chens pa gana e premio mayo di Lotto, cu a crece bira e suma menciona. Si e bolbe keda aden, ta premira cu esaki por yega 3 miyon.

RESULTADONAN

Fuera di e posibilidad di paga debe, tabatin 8 otro opcion pa scohe. Nan tabata varia entre ‘paga tur bo debenan (cas, auto etc) den un solo tiro’,’ inverti bo placa pa traha aun mas placa’, ‘ Regala bo famia parti di e placa’, ‘duna parti di e placa na instancianan di caridad’, ‘treat bo mes cu un auto, of un otro forma’, ‘biaha rond di mundo’, ‘otro cos’, ‘retira di bo trabou’, y finalmente ‘lanta bo negoshi di bo soño’. 

KICO A SCOHE

Fuera di e prome opcion menciona, esnan cu mas a keda scogi, ta esun di inverti sigui pa ‘regala bo famia placa’ y ‘duna parti di e placa na instancia caritativo. Pa straño cu por zona, e opcion pa retira di bo trabou, tabata casi ultimo pues esey por wordo interpreta cu hopi lo keda traha aunke cu nan gana e premio, of debi na e limitacion di por scohe solament 4, no a scohe esaki mas halto. Biaha rond mundo tambe no a cay hopi halto, y esun di ultimo, tabata pa lanta negoshi propio, cu de facto por wordo mira den cierto forma di inversion.