Dama (53) yiu di Corsou ta fayece den accidente di trafico na Hulanda

WILLEMSTAD -  Tabata un shòk pa tur ku konosé Sheila Van de Werp, ora ku e notisia a plama aki na Kòrsou ku Sheila a pèrdè su bida den un aksidente di tráfiko. Esaki por a opservá for di e kantidat di ekspreshonnan di lamento di parti su amigunan i konosí di “Facebook”.

Konforme informashonnan ku a bin for di Ulanda t’asina ku den mardugá tempran di djasabra pa djadumingu riba karetera A58 tabatin un aksidente di tráfiko serio, kaminda ku un vehíkulo ku 7 persona aden lo a aksidentá i un di e okupantenan a fayesé.

Segun e informe ta indiká ku un outo lo a alkansá e vehíkulo ku 7 okupantenan aden di patras i pone ku e shofùr di e outo a pèrdè kontrol i dal den vangrail, pa despues keda riba su banda. E momentu ei un otro outo ku no por a desviá tambe ta alkansá e vehíkulo. Pues dos outo ku 7 okupante aden ta keda alkansá dos biaha.

Otro outonan a para pa duna promé asistensia i yuda esnan ku nan por a yuda. Kuater hende muhé, un hende hòmber i un mucha a keda transportá ku urgensia pa hospital, pero pa Sheila Van de Werp no por a hasi nada mas. El a fayesé na e sitio mes. Okupantenan di e otro dos outonan no a sufri leshonnan di atenshon.

A komprondé ku Sheila tabata un persona hopi alegre.  Kondolensia ta bai na famia di e defuntu.NOTA: Texto scirbi den Papiamento fonetico di Corsou.