Segun encuesta di noticiacla, mayoria chikito kier tapaboca contra Covid19 bek

ORANJESTAD – Segun e ultimo encuesta di noticiacla riba e tema di Covid19, un mayoria chikito di esnan cu a participa, kier pa algun medida bin bek (46%) , awor cu e cantidad di casonan ta aumentando. Di e grupo ey, specificamente 53% kier pa bin cu e regla pa usa tapaboca obligatorio den lugarnan cera. Un otro dato interesante ta e hecho cu mayoria di esnan encuesta cu a haya Covid19 (61%) tabata vacuna ora cu nan a haye. Un total di 780 persona a participa den 6 dia, reparti riba henter e isla, unda cu mayoria tabata hende muher (64%). 

E RESULTADO

Entre esnan cu a participa na e encuesta, tabatin un ‘empate’ entre esnan cu a keda contagia y esnan no (46%-46%), mientras cu 8% no tabata sigur cu nan a keda contagia. Esaki por ta cu nan lo a haye asina suave cu nan no ta kere cu nan lo a keda contagia y lo a keda cu nan a haya un simple ‘griep’

VACUNA

Loke a bira comun aworaki ta cu ora cu un persona haya Covid19, ta puntra mesora si e persona aki tabata vacuna of no, ya cu tabata bisa cu esnan cu vacuna, sea no ta haye, of ta haye leve. Den e caso aki, mayoria di esnan cu a participa y a bisa cu nan a haye, a confirma tambe cu nan tabata vacuna ora cu nan a haye (61%). Un grupo menos grandi, 33% a bisa cu nan no tabata vacuna ora cu nan a keda contagia. Y un grupo mas chikito, 7%, cu ora cu nan a haye prome biaha, nan no tabata vacuna pero di dos biaha si. Esaki por nifica dos cos, esta cu e vacuna no a strobe nan di haya e vacuna, pero alavez e la evita pa nan bira hopi malo y drenta hospital, pasobra esaki a keda basta bashi. Y e siguiente pregunta por confirma esaki, ya cu di esnan cu a haye, 78% a bisa di a recupera completamente mientras cu 24% a confirma cu nan a keda cu efectonan secundario despues, esta no a recupera completamente. 

SIGUI VACUNA

Riba e pregunta cu mirando cu e casonan ta aumentando, a puntra si ta necesario pa sigui vacuna, aunke cu hopi a haye toch cu vacuna, mayoria a bisa cu si (57%), mientras cu 20% a bisa cu no mester sigui cu e proceso di vacuna, y 15% ta pensa cu kizas, y 7% ta indeciso. Pues no sa. Tambe a puntra cua grupo mester enfoca ariba awor, y aki sorpresivamente e grupo mas grandi a scohe pa ‘tur’,(53%), contra p.e. cierto edad (18+) cu tabata 19% y pa e grupo d 50+ tabatin 11% y pa 60+ 17%. 

E VIRUS TEY

Loke ta resalta, ta cu e virus tey, tin basta hende cu kier proteccion pa nan mes, y tambe ta mira e importancia pa sigui vacuna y haya booster pa nan bienestar. Manera tur encuesta, esaki ta uno independiente di Noticiacla, cu e unico meta pa haya datos pa por usa esaki pa finnan noticioso. Mes momento, no ta pretende cu e ta un representacion di e isla completo, sino si, representativo (mas di 500) entre e lectornan di Noticiacla. Masha danki pa e participacion y keda pendiente pa e siguiente encuesta.