Tin directornan di compania semi gubernamental ganando 40 pa 50 mil florin pa luna

ORANJESTAD – Prome minister di Aruba Evelyn Wever Croes a confirma dialuna mainta loke hopi tabata sa caba, y tabata mas bien un secreto publico pero no por a haya ‘confirmacion’. Manera e mandatario a bisa, a bin comproba cu un cantidad di director di companianan semi publico di gobierno, ta ganando ‘un schat di placa’. Hulanda a condiciona Aruba caba pa reduci esakinan, pa epor haya ayudo financiero. Esey no a sosode ainda, y awor Hulanda a condiciona Aruba atrobe, pero pa e biaha aki gobierno por kita e recorte di 5% di salario di trahadonan publico. Esaki mester bin ancra den un ley, cu otro islanan den region, manera St Maarten tin caba, esta e Wever Croes norm, cu ta e top cu un director por gana pa luna.  

SALARIO

E punto di salida, ta e salario di un prome minister of minister. Y riba dje e persona por gana maximo 30% mas. Pues 130% di un salario di minister. E calculacion ta bira mas of menos 261 mil florin pa aña cu mester bira e norma nobo. Despues di a haci un quickscan, a bin encontra salario di 12 director cu ta traha pa compania semi publico, cu a participa den e investigacion. A haci mencion di e salario bruto cu e director ta gana. E sumanan tabata varia di instancia. A resulta cu solamente 1 entidad so ta cay bou di e norma ‘nobo’. Tur otro ta mas halto. Esun mas halto tabata 694 mil florin pa aña pa un director, cu ta equivalente na casi 60 mil florin pa luna. 

RIESGO

Tin companianan cu ta core mas riesgo cu otro, cu ta hustifica salario halto y tin cu no por hustifica esaki. Ora cu a bin cu e norma nobo, a dicidi pa ahusta esaki y haci e norma e ora 410 mil florin pa aña. Esey ta pone cu 9 compania ta cay den dje. Algun so lo a sali pafo. Hulanda sinembargo a rechasa e oferta ey y a para riba cu mester tene na 261 mil florin pa aña, y a bin cu esey mei mei di e pandemia. E tempo ey gobierno bou di presion a tuma esaki pa e por a haya e placa.  E mandatario a sigura cu e companianan estatal manera Elmar, WEB y Utilities, ya caba a ahusta nan salarionan respectivo pa director y ta cay bou di e norma nobo sin cu e ley a pasa caba.