Grupo di Seroe Colorado ta bolbe bringa construccion di hotel Secrets den Corte

ORANJESTAD – Un biaha mas un grupo di habitante di Seroe Colorado ta bay Corte pa bringa e construccion di un hotel na e area en cuestion, e asina yama Secrets hotel di e desaroyadornan Three Rivers. Asina e matutino Bon Dia Aruba ta raporta diamars den nan edicion, y nan fuente ta e abogado di e grupo Maritza Boyce. Nan a haci un prome intento na februari caba di e aña aki y a gana esaki manera cu noticiacla a raporta caba, pa despues wordo para. E intencion ta pa ‘destrui e decision cu Minister di Infrastructura a usa pa duna e permiso di construccion di e hotel’. E motibo cu nan tin cu bay bek corte, ta basa riba (manera informa ariba) e hecho cu toch na final corte a bay di acuerdo pa concedi, ora cu e minister en cuestion ‘ a dicidi pa tuma e obhecion d un di e apelantenan na consideracion’ cu a pone cu ‘hof a considera cu asina a cumpli cu e decision den Lar na februari ultimo’. 

E CASO ANTERIOR

Manera cu e portal aki a raporta algun tempo atras, ora cu e grupo di ciudadano a hiba e gobierno corte, hues a dicta cu Gobierno tabatin 3 luna tempo pa contesta 2 miembro (di 10) di e grupo di Seroe Colorado cu a protesta contra e construccion di hotel Secrets. Segun e sentencia, e decision tabata pa para tur trabou di construccion, pendiente e decision di gobiernbo, pero ainda no tabatin e sentencia. E sentencia   ta mustra e detayenan specifico y motivacion di hues di LAR. 

E GRUPO

E unico dos personanan di e grupo di 10 cu si a haya rason e tempo ey, ta pasobra primorcialmente nan residencia (percela) ta esunan mas cerca di e area di construccion. Mayoria di e ponencianan cu gobierno a trece, a keda rechasa pa e hues di LAR, unda cu ta mustra cu gobierno no a cumpli cu peticionan haci den margen di tempo y ademas, e loke cu nan por a haya (e 2 personanan en cuestion), ta mustra claramente cu e trabounan ta viola e regla y ley segun e asina yama ROPV, cu ta stipula kico por y no por den e area aki. Entre e puntonan, cu e construccion ta birando mas grandi cu originalmente ta papia di dje, (900 camber enbez di 600), y cu e haltura tambe ta contra e regla stipula originalmente. Hues den e sentencia a para tur trabou, y a duna e minister di infrastructura y medio ambiente, e tempo di 3 luna pa dicidi riba e obhecion cu e dos ciudadanonan aki a presenta contra e proyecto. Por lesa e sentencia di e biaha ey, AKI.