Bestlife: Aruba ta entre e 8 paisnan mas facil pa biaha despues di Covid19

MADRID – E rey emerito Juan Carlos I a sali pa Spaña diahuebs merdia (ora di EAU) despues di dos aña di a instala su mes na Emirato Arabe Uni na 2020. E parti interesante ta cu e la haci esaki usando un avion priva, Gulfstream G450 registra na Aruba cu matricula P4-BFL. Segun informacion cu noticiacla tin, e tabata poni pa aterisa pa 6’or y mei di atardi ora di Madrid despues di un buelo di 8 ora, pero tabatin un retraso di 45 minuut y tabata poni pa yega e aeropuerto di Vigo, Peinador na Spaña pa cuarto pasa di 7 anochi. E ta poni pa permanece henter weekend den e localidad Gallego di Sanxenxo pa despues traslada pa Madrid.  Juan Carlos tabata Rey pa 4 decada na Spaña. 

AMSTERDAM – E hefe saliente grandi di e aeroliña KLM Pieter Elbers ta bira e hefe grandi nobo di e aeroliña Indio, IndiGo. Tanto KLM como IndiGo a raporta anteriormente di lo sigui traha hunto. Elbers ta bandona KLM dia 1 di juli proximo y ta cuminsa dia 1 di October di e aña aki cu e aeroliña Indio. KLM mes a dicidi cu no ta prolonga e contracto di Elbers pa un di tres termino. E la sa di mantene KLM bibo durante e pandemia, y aumenta e cantidad di pasahero. Pero esaki no a wordo recompensa pa e aeroliña.   

MOSCU – Rusia ta bay expulsa 34 Franses, 24 Italiano y 27 diplomatico Spaño di e pais. E motibo ta represaya pa expulsion di diplomaticonan Ruso anteriormente. Tur e paisnan menciona a expulsa Rusonan anteriormente. Un total di 300 Ruso a keda expulsa di ciudadnan Europeo recientemente.  

LONDON – E futbolista professional Britanico Jake Daniels te cu dialuna tabata un nomber desconoci den e mundo di futbol. Pero esey a cambia rapidamente ora cu e la anuncia publicamente cu e ta homosexual. E hungador di Blackpool FC awor ta noticia grandi. Y mas ainda ta e sosten cu e ta ricibiendo, cu ta enorme.  Entre esnan cu a sostene, ta e prome minister Britanico Boris Johnson y ex futbolista Gary Lineker y e internacional Harry Kane. Nan ta haya cu e futbolista di 17 aña tin hopi corahe y lo sostene. Ta un aña pasa cu e prome futbolista homosexual a keda revela, cu ta Josh Cavallo di Australia. Nunca antes un futbolista professional a admiti di ta homosexual. 

NEW YORK – E biyonario Mericano Elon Musk a bisa diamars cu su deal pa cumpra e media social Twitter ta para te ora cu e compania prueba cu menos cu 5 porciento di su cuentanan ta falso. Musk ta reacciona asina riba un noticia di un medio enfoca riba Twitter, cu por lo menos 20% di e cuentanan ta falso, cu ta 4 biaha mas cu loke cu e compania ta admiti. Musk tabata cla pa cumpra Twitter pa 44 biyon dollar. Pero segun e biyonario, su oferta tabata basa riba e informacion cu Twitter a provee, ta corecto. 

MOSCU – Dos marca iconico internacional, Mc Donalds y Renault ta bandona Russia definitivamente. Esaki debi na e guera entre Rusia y Ucrania. E marca iconico Mericano Mc Donalds, hunto cu Ikea tabata e promenan cu a drenta Rusia despues cu e muraya di Berlin a cay, mas di 30 aña pasa. Ta e intencion pa un comprador local cumpra e restaurantnan. Pero e logo popular lo wordo kita na tur e restaurantnan proximamente. Mescos lo sosode cu Renault.