AH&SF a organisa un curso di ‘Train-the-Trainer’ pa lidernan den seguridad

ORANJESTAD - Aruba Hospitality & Security Foundation (AH&SF) a ofrese un curso gratis y intensivo cu un duracion di tres dia yama ‘Train-the-Trainer’ pa e lider nan di seguridad y gerentenan cu responsabilidad di seguridad den sector publico y priva. 

E curso di asina yama ‘Train-the-Trainer’ ta basa riba e modelo di seguridad di Israel y ta siña e lider nan con pa prepara nan ekipo pa reconoce y preveni menasa prome cu nan tuma luga. 

Di acuerdo cu e presidente di AH&SF, Dylan Molina: “Como cu Aruba su turismo ta recuperando, e ta importante pa e profesionalnan di seguridad sigui mehora nan habilidadnan pa asina nan por sigui yuda preveni crimen. AH&SF ta contento di por ofrece e programa di training dedica aki y di observa un participacion grandi”.  

E programa ‘Train-the-Trainer’ a wordo crea y dirigi pa e compania Americano Chameleon Associates. E participantenan a ricibi un training di con pa train nan miembronan di departamento den nan respectivo organisacion pero tambe ariba con pa conduci un evaluacion di nan propiedad basa riba vulnerabilidad y menasa nan. Tur participante a ricibi un certificado di participacion despues di a completa un evaluacion.

Trainernan certifica tin e posibilidad di registra miembronan di nan ekipo pa e “Chameleon Learning Management System” (LMS), unda cu nan por atende varios curso di seguridad online incluso ariba e topiconan cu a atende durante e programa. AH&SF ta gradici La Cabana pa tabata e anfitrion pa e curso di 3 dia.

AH&SF a wordo funda pa AHATA den colaboracion cu departamento di polis na aña 2001, cu e mision pa sostene seguridad den e area turistico. E proyectonan di AH&SF ta wordo financia pa Aruba Tourism Authority (ATA), cu fondonan genera pa e impuesto di turismo cu ta wordo cobra na e turista na nan lugar di estadia.