Yiu di ex minister a recobra su libertad diabierna anochi

ORANJESTAD – E di tres sospechoso den caso penal Flamingo, e homber di inicial J.A. Oduber, a keda den libertad diabierna anochi den careda di 7:30pm, despues di tabata encarcela pa casi 3 dia. Su abogado mr Demis Illis a confirma esaki pa noticiacla diabierna anochi. E tabata encarcela riba sospecho di estafa (oplichting), y a keda deteni diamars mainta. Despues di un dia di interogacion e la keda encarcela y despues su detencion a keda prolonga cu 8 dia, cu ta e regla normal. Pero manera cu e portal aki a raporta tambe, esey no kier men necesariamente cu e persona ta keda cera pa tur 8 dia. E yiu di ex minister Otmar Oduber, cu ta e sospechoso principal den e caso aki, ta den libertad pero ta keda un sospechoso por lo pronto. No ta descarta cu lo tin mas detencion na caminda.