Chauffeur di Toyota Vitz envolvi den accidente fatal a entrega su mes

ORANJESTAD - E chauffeur masculino di e Toyota Vitz envolvi den e accidente fatal di awe marduga, a entrega su mes awe mainta na warda di Noord. Asina vocero suplente di polis Liliana Rasmijn a confirma diaranson merdia. E chauffeur ta L.E.H.C. 20 aña. Cuerpo Policial ta haci un apelacion na pueblo, cu ora di dal auto pa keda warda ariba polis of roadservice. Ta prohibi pa bay for di e sitio prome cu un di nan yega ya cu tin un castigo pa e persona si e bandona e sitio. Esta, cu ta castigabel pa ley ora cu un persona bandona e sitio despues di un accidente. 

E ACCIDENTE 

Manera cu noticiacla a raporta caba, tabata awemainta pa mas o menos 01:23am cu central di polis a dirigi su patruya cu maximo urgencia riba e caminda principal di Watty Vos Blvd. for di rotonde cumana pa direccion retonde paperclip pa un accidente pisa cu heridos. Un Toyota model Vitz color shinishi numera A-57912 probabelmente a dal den e pick-up marca Toyota, modelo Hilux color cora numera A-2462. Dor di e impacto serio aki e Toyota pick-up a bay cay den e rooi band’i caminda. E chauffeur di e Toyota Vitz a bandona e sitio di accidente na e yegada di e patruya.

Bombero y ambulance a yega cu maximo urgencia na e sitio di accidente pa libera e victima como tambe e ocupante, un señora , pega den e pick -up. BFTO y specialista di trafico tambe a yega na e sitio pa investiga e accidente.

Lamentabelmente pa 2:20am Dr. Texier a constata morto di e cabayero cu ta victima di e accidente cu ta Robert A. Calmes naci na Aruba dia 16 september 1964 e tabata tin 57aña di edad. E caso ta bao investigacion dor di specialistanan di trafico di Cuerpo Policial Aruba.