Awe na Corsou ta haya sa cuanto trahado di Damen ta haya retiro riba dok

WILLEMSTAD - Despues ku a bira konosí ku e kompania astiero Damen lo bai kita un kantidat basta grandi di trahadó for di trabou, a surgi un situashon basta tenso na e kompania. For di den oranan di mainta trahadónan ta den insertidumbre i esaki a pone ku trahadónan a bandoná tereno di DOK i a para pafó, ya ku niun hende no por a traha mas. E notisia a kai manera un baño di awa friu. E informashon tabata ku esnan ku ta riba e lista di bai kas, lo haña yamada di telefòn den kurso di dia.

Te ku ayera anochi Extra tabatin kontakto ku sr. Angelo Meyer, Presidente di e sindikato PWFC, a duna di konosé ku trahadónan a kuminsá haña yamada, pero na e momentunan Meyer no por a bisa kuantu trahadó a haña yamada. E tin kontakto konstantemente ku e “shopsteward” nan i nan ta notifikando su persona kada bes ku nan tende di trahadónan ku a haña yamada. Un kos ta sigur, na opinion di Meyer, for di ora ku dos ehekutivo haltu di e kompania biaha di Ulanda pa Kòrsou, no ta pa kita 5 hende, pero lo ta un kantidat supstansial.

Meyer a splika ku te djaluna anochi no tabatin niun indikashon ku lo bai tin retiro na e astiero. Ta ora el a lanta mainta 5 or, el a tuma nota di un mail ku lo a drenta algu pa 11 or di djaluna anochi kaminda ku Gerensia ta warda nan di sindikato pa duna informashon ku lo bai baha hende. Esei ta momentu ku el a tuma kontakto ku e “shopsteward” nan pa prepará pa e reunion ku lo tuma lugá 1.30 or di ayera mèrdia.

Entre tantu e notisia a plama i trahadónan a kai den un situashon di insiguridat, pa motibu ku e momentu ei niun hende no sa ken ta riba e lista di bai kas òf no. 

E invitashon tabata pa djis pa partisipá e sindikato kiko ta bai tuma lugá, pa motibu ku den oranan di mainta Gerensia di Damen a papia kaba ku tur e hefenan di e diferente departamentonan i tambe di e diferente kompanianan ku ta traha den Dòk.

Despues ku Gerensia a papia ku e sindikato, e dos miembronan di gerensia ku a bin for di Ulanda, nan mes a aserká e trahadónan i notifiká nan kiko ta bai pasa. NOTA: Texto ta scirbi na Papiamento fonetico di Corsou.