Merca tin Aruba keto bay riba nivel di alerta mas halto contra biahamento

WASHINGTON – E nivel di alerta di biahe pa Aruba for di Merca, dialuna atardi ketobay tabata nivel di mas halto, esta nivel 4 pa loke ta Covid19. Esaki no obstante cu diabierna minister di turismo Dangui Oduber a bisa cu esaki lo a cambia entrante awe dialuna 10 di April. Awe mainta a tuma contacto cu e mandatario cu a keda di bay investiga kico por a pasa cu esaki no a cambia, manera cu e la bisa cu e lo a sosode. E alerta ultimo biaha cu Merca a cambia esaki tabata na januari (4 di januari 2022) di e aña aki, ora cu nos a drenta den un di 4 ola super pisa cu cifranan di casonan positivo a aumenta drasticamente surpasando mil caso pa dia. Despues di un luna, esaki a baha atrobe na nivelnan aceptabel, pero Merca a keda mantene e nivel di alerta halto. Den 2021 tambe tabatin un biaha cu Merca a haci mescos esta na comienso di augustus (8 augustus 2021), y a tarda basta pa esaki keda ahusta (22 di november 2021). E nivel a keda por lo menos 3 luna riba alerta di mas halto, pa apenas algo mas di un luna despues esaki bolbe keda adapta bek pa esun di mas halto.