Na Corsou, prome minister Pisas kier Conferensia di Reino riba COHO

WILLEMSTAD - Promé minister Gilmar Pisas ke un Konferensia di Reino riba nivel polítiko riba COHO. Den e konferensia aki lo atendé 7 punto di atenshon entre otro e restante di outonomia di Kòrsou ku a keda mina i tambe otro kondishonnan ku ta desfaborabel.

Sr. Pisas resientemente a manda e karta aki ku e puntonan pa sekretario di estado sr. Alexandra van Huffelen. El a indiká ku ainda tin puntonan di atenshon. Esakinan a keda trese dilanti durante ku parlamento di Kòrsou a kuminsá ku un prosedura di konsulta kaminda a skucha algun eksperto riba COHO.

Ademas komunidat tambe tin su preguntanan pa ku e lei.

Aparte di esakinan sr. Pisas a bisa ku na komienso di luna di mei lo tin IPKO na St. Maarten i un dje puntonan di agènda pa parlamentonan di Reino atendé ta e COHO. Pues ta preferá pa tin un relato for di IPKO riba e lei, komo tambe un relato di parlamento di Kòrsou.

E aspekto di “pèrdèmentu” di nos outonomia ta algu ku ainda pais no por biba kuné i no tin un klaridat bon kla riba esaki.

Loke ku falta den COHO tambe ta un palabrashon bon kla di parti di Reino tokante e invershon ku Kòrsou mester haña i ku mester kana pareu ku e reformanan manera indiká den e ‘Landspakket’.

Ademas dia promé di sèptèmber 2020 tin un moshon di parlamento kaminda ta bisa ku for di 10-10-10 ku a aseptá Leinan di Konsenso no ta aseptá mas. Ku e lei aki lo no ta otro.

Antisipando ku parlamento di e tres paisnan St. Maarten, Kòrsou i Aruba a pidi pa entrega un relato te ku 17 yüni próksimo, sr. Pisas ta haña ku tin tempu sufisiente pa por organisá e konferensia di Reino riba nivel polítiko riba e lei di konsenso COHO.

Ademas sr. Pisas a agregá e lista ku 7 punto ku ke mira pa ser trata debí ku nan ta puntonan di masha atenshon. Un dje puntonan Pisas ke mira kambia ta esun di COHO. Segun promé minister e nòmber “COHO” ta mancha dor di diskushon di komunidat relashoná ku e sobra di outonomia di Kòrsou ku ta keda mina i otro kondishonnan no faborabel; COHO ta establesé na Ulanda, e minister di BZK por duna instrukshon na COHO pa loke ta trata temanan ku tin riba e agènda di ehekushon; COHO por sera protokòlnan di kolaborashon ku institutonan den Reino i pafó di esei manera IMF, Union Oropeo, Banko Mundial i instansianan di Nashonnan Uni komo órganonan di Ulanda i otro islanan; ta minister di BZK ta buska e miembronan di COHO i asina ta e minister ulandes tin influensia riba eskoho di kandidatonan i no tin klaridat ku hendenan di pais por partisipá den COHO. Ta papia solamente ku e hendenan den COHO mester tin afinidat ku e islanan; COHO por mishi ku ministerionan, kompanianan di gobièrnu dor di pidi informashon loke no ta kuadra. Finalmente otro asuntunan di outonomia i otro puntonan desfaborabel ku parlamento a tende di ekspertonan ku nan a konsulta.

Pues esaki ta e karta ku promé minister Pisas a manda pa minister van Huffelen pidiendo un konferensia di Reino riba COHO. NOTA: E texto ta scirbi den Papiamento fonetico di Corsou.