Avion ta parti na dos durante aterizahe di emergencia na Costa Rica

SAN JOSE – Un avion tipo boeing 757 di carga di e compania DHL a parti na dos mientras cu e tabata den un aterisahe di emergencia diahuebs na e aeropuerto internacional Juan Santamaria, 25 kilometer for di e capital San Jose na Costa Rica. E accidente no tabatin victima, pero si a pone cu mester a cera e aeropuerto temporalmente.  E dos personanan a bordo ta den bon estado, segun hefe di bombero general Hector Chaves a bisa. E avion tabata na caminda pa Guatemala, pero a bolbe Costa Rica pa un fayo mecanico. E problema aparentemente tabata cu e sistema di brakes, cu a obliga e avion di regresa despues di tabata bulando 25 minuut. Durante e aterisahe, e avion a slip, baha di e pista y parti na dos, cu a spanta habitantenan den cercania di e aeropuerto. Hopi ta e videonan di habitantenan cu a logra filma e accidente. Debi na e accidente, mester a cera e aeropuerto pa por lo menos 5 ora cu a causa centenares di cancelacion di buelo y incomoda por lo menos 8 mil pasahero. Potret cortesia Ezequiel BECERRA / AFP