Tweede Kamer a duna Aruba poco mas tempo pa reacciona riba COHO

DEN HAAG – Parlamentonan di Aruba ( hunto cu St Maarten y Corsou) a haya mas tempo pa prepara nan reaccion riba e ley di COHO, aunke no mes hopi cu a pidi. Asina e portal hulandes dossierkoninkrijkrelaties ta raporta. Segun e portal, e comision di Tweede Kamer di Relacionan di Reino a bay di acuerdo cu e peticion, aunke no pa entrega e conseho dia 17 di juni, sino hopi mas prome esta 13 di mei proximo. E decision no tabata unanime segun e portal, ya cu ta haya cu a warda basta caba, y cu mester tin esaki cla prome cu receso di zomer. 

DIVISION

Entre nan, tabatin di CDA y VVD (Joha van de Berg y Rolien Kamminga) cu ta haya cu a warda suficiente caba, esta 2 aña. Attje Kuiken tabatin menos problema, basta cu e tuma lugar no mucho despues di e proximo reunion di IPKO na St Maarten na mei. Hopi di e parlamentarionan kier mira e ley bira un hecho pa 11 di juli 2022 mas tarda. E extension tambe ta conta pa e RAFT.