Parlamento ta cuminsa trata presupuesto 2022 diaranson

ORANJESTAD – Parlamento di Aruba ta cuminsa tratamento di presupuesto 2022 diaranson mainta awor, esta mayan. Por lo menos, esey ta e intencion di Presidente di Parlamento Edgard Vrolijk. E intencion ta pa yama e reunion diaranson (mayan) mainta 9’or. Sr Vrolijk a splica noticiacla cu e la programa 5 dia di trabou pa trata e presupuesto, di cual e ultimo dia ta solamente pa votamento di e presupuesto. “Mi a programma pa 5 dia. Tur dia dos minister y di 5 dia si mester ta bin pa votacion so” sr Vrolijk a sigui bisa. 

TEMPO PA STUDIA PRESUPUESTO

E presidente a mustra tambe cu contrario na biahanan anterior, e la duna casi un luna di tempo pa Parlamentarionan prepara y studia e presupuesto. “Pues mi ta spera di mester por haya betoog riba nivel y no lesamento so di Raad van Advies” e presidente a bisa e portal aki. “Paso sino e no a sirbi su meta tanto tempo pa studia bon” Vrolijk a sigui bisa. 

E SCHEDULE

E presidente a mustra cu e schedule planea ta cu riba prome dia di tratamento, ta trata presupuesto di ministernan Rocco Tjon y Glenbert Croes, sigui pa dia dos Dangui Oduber y Ursell Arends, dia 3 Endy Croes y Geoffrey Wever, y e dia final di ministernan ta Xiomara Maduro y Prome minister Evelyn Wever Croes. E dia #5 lo ta e ora solamente pa votamento. Claro cu cos por cambia na caminda pero esaki ta e plan. Esey ta nifica cu pa otro siman diamars, presupuesto 2022 lo mester keda sea aproba of desaproba.