Wever: Por campa na lugarnan tradicional tambe manera Fishermans Hut y Eagle Beach

ORANJESTAD - Por campa na lugarnan tradicional tambe manera Fishermans Hut y Eagle Beach . Manera cu e portal aki a trece dilanti dialuna mainta riba e confusion cu a surgi cu e lugarnan di campamento, awe gobierno (lesa:prome minister Wever) a duna aclariacion. Tabata durante e conferencia di Prensa di Gobierno, cu e prome mandatario  a trata e tema di campamento. Despues di dos aña cu comunidad no tabata permiti pa campa pa motibo di e cifranan di covid, e aña aki si e ta posibel. Prome Minister ta haci apelacion na comunidad pa cada ciudadano ta responsabel, sigui cuida, respeta naturalesa y reglanan di Cuerpo Policial. 

CONFUSION

E discusion tocante permisonan cu a wordo nenga ta trata entre otro na diferente sitio entre otro Fisherman’s Hut y Eagle, pa cual Prome Minister a informa cu tabata trata di un mal entendimento riba e ley di ROPV cu a drenta na vigor aña pasa. E ley di plan di desaroyo teritorial ta enfoca riba entre otro conserva naturlesa y beachnan. Den cuadro di esaki mester menciona cu lugarnan unda hende ta campa tradicionalmente ta cay bou di ‘bestaande situaties’ y ta keda intacto. Ademas, campamento no ta algo structural y pesey e tradicion di campamento por continua teniendo na cuenta reglanan di cuerpo policial y orden publico. “Pues na Fisherman’s hut caminda cu tradicionalmente hende ta campa y na Eagle unda cu tin mata y cu hende semper por a campa, ta keda posibel pa campa,” Wever - Croes a enfatisa. 

Considerando esaki, Prome Minister ta haci peticion fuerte na henter comunidad pa cuida e beachnan. “Nos a caba di drecha e beachnan di Arashi, Boca Catalina y di Eagle, pa asina tur hende por gosa di nan. Pesey awor e ta responsabilidad di cada persona cu ta haci uzo di nan pa percura cu ta cuida nan.”