No tin garantia cu por paga ambtenaarnan aki tres luna

ORANJESTAD – “Nos no tin niun garantia cu gobierno tin placa pa paga salario aki tres luna” . Asina prome minister Evelyn Wever a bisa durante e briefing riba coronavirus diahuebs anochi. Segun e mandatario, el a bisa esaki algun biaha caba, pero a keda ripiti ayera nochi basa riba e pregunta di e forza financiero di gobierno y cu tur e placa cu ta pidiendo, si aki tres luna gobierno gobierno por paga salario. E contesta pues ainda ta ‘no’. De hecho, ta trahando duro pa por keda cla pa paga salario di e proximo tres lunanan. “Garantia cu aki tres luna tin placa pa paga salario, mi no tin”, e prome mandatario a bisa. “E garantia cu mi por duna ta, cu nos ta luchando di dia y anochi, cu tur esfuerso posibel cu nos por humanamente posibel, pa nos yega na e placa pa asina nos por cumpli cu nos debenan awor, y den futuro” Wever a bisa. 

PROBLEMA FINANCIERO

Segun Wever, e problema financiero di nos pais ta gigantesco. “E hecho cu berdad nos tin un presupuesto aproba,- esey ta un bon cos,- pero nos no tin e fondonan p’e” Wever a bisa. Esaki pasobra fondonan internacional no ta hopi acesibel aworaki cu e coronavirus. Segun Wever, hopi porta a cera pa nos fia placa. Sigur ora cu Fitch a downgrade Aruba recientemente. Esey ta haci’e mas dificil pa por fia placa. Di otro banda, a anuncia cu S&P si a dicidi pa no downgrade Aruba. Y ademas Hulanda a duna Aruba un ‘zachte lening’, esta un prestamo sin interes pa e suma di 42.8 miyon florin.