Lo pidi Corte persigui tur 5 polis pa morto Mitch Henriquez

Lo pidi Corte persigui tur 5 polis pa morto Mitch Henriquez

Posted on 03/9/2017 10:14 pm AST | Updated on 03/11/2017 3:03 pm AST

ORANJESTAD – Otro siman diaranson abogado di famia di Mitch Heriquez (dfm), Richard Korver lo pidi Corte obliga OM persigui tur 5 polis cu tabata envolvi cu su detencion, pa morto di Henriquez. E abogado ta na Aruba actualmente pa pone su mes na altura di e situacion local di su clientenan. Na cas di ruman di Mitch Henriquez, e abogado a papia cu NoticiaCla.com diahuebs atardi y splica cu e ta spera cu e informacion cu e acumula na Aruba, por yuda su caso proximamente na Hulanda otro siman. “Si mi no ta kere cu mi lo tin un caso, mi lo no a cuminsa mes cu e caso” Korver a sigura e portal aki diahuebs atardi.

SPECIALIDAD DI E ABOGADO

E abogado ta asesora famia di Mitch Henriquez y ta specialisa den procedura penal na Hulanda y specificamente pa famianan di victimanan di crimen. “Mi kier a mira unda Mitch Henriquez a biba, y mi ta aki riba invitacion di Parlamento di Aruba pa asina papia cu nan y otro gobernante, pa splica nan kico e situacion di e caso actualmente ta” Korver a bisa. Ela papia cu ruman mayo di e victima, a bishita e graf unda cu Mitch Henriquez ta dera, y awor tin un miho bista fuera di loke tin den e dossier. Ademas a papia tambe cu presidente di comision di husticia di parlamento, Desiree de Sousa Croes.

PROCEDURA ARTICULO 12

Korver mientrastanto a entama un caso basa riba articulo 12 na Hof, cu ta encera cu ta pidi Hof pa duna OM e orden pa no persigui solamente e dos agentenan policial cu nan ta persiguiendo, pero tambe tur e otronan (total di 5), y no persigui nan solamente pa maltrato, sino tambe pa laga e victima den un situacion teribel pa cual tin un castigo mas halto. “OM berdad a pone homicidio involuntario como cargo, pero a indica caba cu lo bay pidi vrijspraak pa esey. Algo cu mi ta haya remarcabel cu nan no ta pone e delito aki mientras cu e dossier ta yama pa algo asina”.

POSIBILIDAD DI EXITO PA E CASO

E suerte cu e caso aki tin segun e abogado, ta cu tin hopi material visual. “Tabatin hopi ciudadano cu a filma e detencion di sr Henriquez. Eynan bo ta mira polisnan sinta riba dje, mientras cu agentenan ta sigura cu nan no a sinta riba dje” Korver a bisa. Tambe declaracion cu e victima lo a bira malo den e bus, tampoco ta corecto, pasobra ta claramente visibel cu sr Henriquez a drenta e bus fuera di conocemento. Pues e declaracionnan segun e abogado, ta completamente incorecto di e polisnan. “Eynan bo mester persigui nan. Mi ta spera cu Hof lo compronde nos punto”. Lo mester tin motibo cu e otro polisnan no ta wordo persigui. E portal aki a puntra e abogado kico ta pone pensa cu e si por convence corte cu nan mester wordo persigui tambe. “Nos no a logra na OM pa nan a pone e cargo di homicidio involuntario y morto pa negligencia. Pesey nos ta bay Hues pa pidi hues duna OM orden pa haci esey”.

DIFERENCIA DI CULTURA?

E hecho cu Korver ta na Aruba ta lag’e conoce parti di e cultura den corto. E pregunta ta keda cu si ta considera e caso aki como uno basa riba discriminacion, den sentido cu si tabata trata un Hulandes Europeo, cu si cos a bay diferente. “Loke mi ta compronde ta cu Arubiano gusta haci chiste. Henriquez a haci un joke, garando na su parti intimo y haciendo como si fuera e tabatin un arma. Varios polis a compronde e parti ey tambe di e chiste, pero otronan no. Y eseynan a bula riba dje, bula riba dje cu tur consecuencia. Eynan por papia di un diferencia di interpretacion”. E abogado ta confirma cu por tin di haber cu Henriquez no tabata un Hulandes Europeo, cu a pone cu e cos a bay manera cu ela bay. Un polis di Aruba, cu tabata trahando, segun e abogado, a purba trankilisa e situacion, pero otronan a escala e situacion. No por papia di algo cu a bay simplemente robes. Un persona cu haci malo, por wordo deteni, mester wordo treci warda y scucha pa loke ela haci malo. Y no cu e mester wordo transporta cu ambulance y ta bin fayece despues, segun e abogado.

POLIS PERSIGUI HOPI

Abogado Korver ta admiti cu no ta sosode hopi cu polisnan na Hulanda ta wordo persigui. “Den e caso ey, e ta algo unico. Loke ta unico tambe ta cu e famia (di Henriquez) no por mira e polisnan, y no sa con e nombernan ta di e polis. Algo cu no ta normal segun Korver. “E ta straño cu esey no ta sosode. Y mas aun, e polisnan ta wordo completamente isola y proteha y no sa mes ken nan ta. Nan ta wordo identifica cu un ‘code’. “E ta algo cu mi clientenan tin hopi problema cu ne”.

  • Alpina
  • Powered by SETAR