Trabou na edificio John G. Eman ta programa pa cuminsa mitar di october

ORANJESTAD — E proyecto pa restaura y duna un destino nobo na e edificio historico John G. Eman den Caya G.F. Betico Croes ta preparando pa drenta fase di ehecucion. Segun minister Geoffrey Wever, e aanbesteding pa e prome fase ta programa pa 2 di october, cu inicio di trabounan di desmantelamento proyecta pa mitar di october.

Den e fase aki, partinan no-monumental lo wordo kita pa prepara e structura historico pa restauracion. Wever a reuni cu Stichting Monumentenfonds Aruba pa evalua progreso y coordina e siguiente pasonan.

E antiguo edificio di Aruba Bank lo combina oficina pa Centraal Bureau voor de Statistiek (CBS) y Sociaal Economische Raad (SER), cu apartamento y un espacio comercial/horeca. E diseñonan y plannan pa e diferente funcionnan ta den fase final di elaboracion.

E edificio a wordo entrega oficialmente na Monumentenfonds na december 2025. E proyecto ta forma parti di e plan pa revitalisa centro di Oranjestad, preservando patrimonio historico y combina trabou, vivienda y actividad economico den un solo edificio.